გიორგი შაქარაშვილის საქმის ერთ-ერთი მოწმე კონსტანტინე ღიბრაძე, იგივე დიჯეი კოკო, დღეს მცხეთის რაიონულ სასამართლოში მომდინარე პროცესზე იმყოფებოდა. მან მედიასთან საუბრისას აღნიშნა, რომ ადვოკატების კრიტიკა მოწმეების მიმართ, გამომდინარეობს იქიდან, რომ მათ რეალურად არცერთ კითხვაზე პასუხი არა აქვთ და ისინი საქმის არევას ცდილობენ.

"რა თქმა უნდა, ეგ არის, უბრალოდ, თითის გაშვერა ჩვენსკენ, ვინაიდან არცერთ კითხვაზე არა აქვთ მათ პასუხი და უბრალოდ ცდილობენ სიტუაციის არევას და სიტუაციიდან დაძვრენას.

რაც შეეხება იმ საინფორმაციო ომს, რასაც კონკრეტული პიროვნებები და ადვოკატები აწარმოებენ, ვინაიდან ჩვენ ხშირად არ ვთანამშრომლობთ მედიასთან, ეს იმას არ ნიშნავს, რომ სიმართლის დადგენა არ გვინდა, ან არ გვინდა დაისაჯონ ის პირები, ვინც გიორგის მკვლელობაში მონაწილეობენ. ეს ყველაფერი გამოწვეულია იქიდან, რომ თქვენ, მედიის მხრიდანაც ხდება ამით მანიპულირება და ჩემთვის პირადად, როგორც მოწმისთვის მიუღებელია ეს", — აცხადებს კონსტანტინე ღიბრაძე.

შაქარაშვილის საქმესთან დაკავშირებით ჩანიშნული სასამართლო პროცესი, სადაც 10 მოწმე უნდა გამოკითხულიყო, მეორედ გადაიდო. სხდომის გადადების მიზეზი გახდა, ზ.ხ-ს საზოგადოებრივი ადვოკატის შუამდგომლობა ვადის გახანგრძლივებასთან დაკავშირებით. მისი თქმით, საქმე მოცულობითია, ამიტომ მან სხდომის გადადება მოითხოვნა. მოწმეების გამოკითხვა 31 აგვისტოს განახლდება.

დღეს ასევე, ცნობილი გახდა, რომ გიორგი შაქარაშვილის საქმეზე ბრალდებულმა ორმა არასრულწლოვანმა შიმშილობა შეწყვიტა. ერთ-ერთი ბრალდებულის ლ.შ-ს ადვოკატის, ზაქრო გვიშიანის თქმით, მისმა დაცვის ქვეშ მყოფმა და ბრალდებულმა ზ.ხ-მ ეს გადაწყვეტილება 21 აგვისტოს მიიღეს.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც.-ს; ლ.შ.-ს; ნ.ქ.-ს და გ.მ.-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ.-ს და ა.ქ.-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.