გიორგი შაქარაშვილის საქმეზე ბრალდებულმა ორმა არასრულწლოვანმა — ზ.ხ-მ და ლ.შ-მ შიმშილობა შეწყვიტეს. ამის შესახებ, მცხეთის რაიონულ სასამართლოს ეზოში ადვოკატებმა ჟურნალისტებს პროცესის დაწყებამდე განუცხადეს.

ერთ-ერთი ბრალდებულის ლ.შ-ს ადვოკატის, ზაქრო გვიშიანის თქმით, მისმა დაცვის ქვეშ მყოფმა და ბრალდებულმა ზ.ხ-მ შიმშილობა 21 აგვისტოს შეწყვიტეს.

"შეწყვიტა შიმშილობა, რადგან ჩვენ წარვადგინეთ შუამდგომლობა კომუნიკაციის აკრძალვის მოხსნის თაობაზე ბრალდების მხარესთან, ეს იყო მთავარი მიზეზი შიმშილობის გამოცხადებისა და ჩვენ იმედი გვაქვს, რომ ეს შუამდგომლობა იქნება დაკმაყოფილებული პროკურორის მხრიდან", — აცხადებს ადვოკატი.

მისი განცხადებით, დადასტურებულად მხოლოდ ორი არასრულწლოვნის გადაწყვეტილების ესახებ იცის, ხოლო აგრძელებს თუ არა მესამე არასრულწლოვანი ა.ქ შიმშილობას უცნობია.

გიორგი შაქარაშვილის საქმეზე, დღეს, 26 აგვისტოს მცხეთის რაიონულ სასამართლოში, საქმის მოწმეების დაკითხვა მიმდინარეობს. დღეს მტკიცებულებების გამოკვლევისა და მოწმეების დაკითხვის ეტაპი იწყება.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც.-ს; ლ.შ.-ს; ნ.ქ.-ს და გ.მ.-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ.-ს და ა.ქ.-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.