ღირსეული პარტნიორი 2020 სექტემბერში გაიმართება. კერძოდ, 7-8 სექტემბერს ვაზიანის სამხედრო აეროდრომზე, ვაზიანის პოლიგონსა და ნორიოს საწვრთნელ ბაზაზე.

"ძალა პარტნიორობაშია" — ამ მთავარი გზავნილით საქართველო მრავალეროვნულ სწავლებას ღირსეული პარტნიორი 2020 უკვე მეხუთედ უმასპინძლებს.

არმიჰოლში საინფორმაციო ბრიფინგზე, სწავლების დეტალებზე თავდაცვის ძალების მეთაურის მოადგილემ, ბრიგადის გენერალმა, ირაკლი ჭიჭინაძემ ისაუბრა და განაცხადა, რომ წლევანდელი სწავლების მიზანია საქართველოს, აშშ-სა და პარტნიორ ქვეყნებს შორის მზადყოფნის და თავსებადობის გაუმჯობესება, შავი ზღვის რეგიონში სტაბილური და უსაფრთხო გარემოს შენარჩუნებაში წვლილის შეტანა.

"მრავალეროვნული წვრთნა კომპლექსურია და მისი სცენარი სამეთაურო-საშტაბო და საველე სწავლებებს საბრძოლო სროლებით ითვალისწინებს, ასევე, სამანევრო და საბრძოლო მხარდამჭერი ელემენტების ურთიერთქმედებას სტაბილურობის, თავდაცვით და შეტევით ოპერაციებში", — განაცხადა ირაკლი ჭიჭინაძე.

სექტემბერში დაგეგმილ მრავალეროვნულ წვრთნაში საქართველოს, აშშ-ს, გაერთიანებული სამეფოს, პოლონეთისა და საფრანგეთის 2 700-ზე მეტი სამხედრო მოსამსახურე მიიღებს მონაწილეობას. საქართველოს თავდაცვის ძალების შეიარაღებაში არსებული ჯავშანტექნიკის, საბრძოლო მანქანებისა და საარტილერიო სისტემების გარდა,
სწავლებაში ჩართული იქნება ამერიკის შეერთებული შტატების საფრენი საშუალებები და ჯავშანტექნიკა.