დღეს მთავრობის ადმინისტრაციასთან შატილში მომხდარ ტრაგედიასთან დაკავშირებით თანაგრძნობის გამოსახატად აქცია მიმდინარეობს. საგზაო უსაფრთხოების პრიორიტეტად გამოცხადების მოთხოვნით აქციას უერთდებიან ორგანიზაციები: საქართველოს ალიანსი უსაფრთხო გზებისთვის, ფონდი პარტნიორობა საგზაო უსაფრთხოებისთვის, ჩემი ქალაქი მკლავს, საქართველოს ტრანსპორტის და გზების ასოციაცია და ურბანული ლაბორატორია.

აქციის მთავარი მოწოდებაა: "გახდეს საგზაო უსაფრთხოება ქვეყნისთვის პრიორიტეტი".

აქციის ერთ-ერთი ორგანიზატორი ორგანიზაციის ჩემი ქალაქი მკლავს დამფუძნებელი, გიორგი ჯაფარიძე აღნიშნავს, რომ დღეს მათი შეკრების მიზანია მიმართვა მთავრობისადმი — გადადგან რიგი ნაბიჯები ავტოსაგზაო შემთხვევების შესამსუბუქებლად.

"ყოველწლიურად დაახლოებით 500-ზე მეტი ადამიანი იღუპება ავტოსაგზაო შემთხვევების შედეგად და ჩვენ გვინდა, რომ ეს ციფრები შევამციროთ და ამისთვის საჭიროა, მთავრობამ რიგი ნაბიჯები გადადგას. მაგალითად, გაუმჯობესდეს და გამკაცრდეს ტექინსპექტირების სისტემა, გზებზეც მოხდეს მონიტორინგი, დაყენდეს კამერები და ა.შ. მართვის მოწმობის აღება უნდა მოხდეს რა ისე, როგორც ახლა ხდება, არამედ უნდა მოხდეს ქალაქში ჩაბარებით", — აღნიშნავს გიორგი ჯაფარიძე.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. გარდაიცვალა 17 ადამიანი, 3 კი მძიმედ დაშავდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.