თსსუ-ს პირველი საუნივერსიტეტო კლინიკის დირექტორის, ლევან რატიანის განცხადებით, შატილის ავტოსაგზაო შემთხვევის შედეგად დაშავებულ სამივე პაციენტთან დადებითი დინამიკა გამოიხატება.

"ისინი მოთავსებულნი არიან რეანიმაციულ განყოფილებაში. მათი საშუალო ასაკი გახლავთ 25 წელი. ამ ეტაპზე მათ მდგომარეობას დადებითი დინამიკა აღენიშნება. სამივე მათგანთან დადებითი დინამიკა გამოიხატება იმაში, რომ ჰემოდინამიკის მაჩვენებლები უფრო სტაბილურია, ვიდრე იყო რამდენიმე საათის წინ", — აღნიშნავს რატიანი.

მისივე თქმით, პაციენტებს სიცოცხლის ნიშნებიც გააჩნიათ, კერძოდ გუგის რეფლექსები. თუმცა ამ ეტაპზე, ისინი მართვით სუნთქვაზე იმყოფებიან.

"ვიმედოვნებ, რომ ასეთი პროგნოზი იქნება და პაციენტები დაიწყებენ დადებითი დინამიკით გამოჯანმრთელებას. ამ ეტაპზე ინტერვენციული ჩარევა არ ხორციელდება, ხორციელდება ყოველწუთიერი მონიტორინგი და ყველაფერს აკეთებს მედპერსონალი რომ მათი სიცოცხლე შენარჩუნდეს", — ამბობს რატიანი.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. გარდაიცვალა 17 ადამიანი, 3 კი მძიმედ დაშავდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.