გარდა საერთო პოლიტიკური ხელშეკრულებისა, ოპოზიციურმა პარტიებმა შეკრებაზე საერთო მონაცემთა ბაზისა და ამომრჩევლის ხმების დაცვის საერთო შტაბის შექმნის გადაწყვეტილება მიიღეს. მათი თქმით, პოლიტიკურ გადაწყვეტილებებთან ერთად აუცილებელია კონკრეტული მექანიზმების შექმნაც, რაც არჩევნების სამართლიან გარემოში ჩატარებას უზრუნველყოფს.

ევროპული საქართველოს ლიდერის, დავით ბაქრაძის განმარტებით, განხორციელდა 3 გადაწყვეტილება:

  1. შეიქმნება ამომრჩევლის ხმების დაცვის საერთო შტაბი, რომლის ხელმძღვანელიც პაატა დავითაია იქნება. შტაბში წარმოდგენილი იქნება ყველა ოპოზიციური პარტია. ეს იქნება სტრუქტურა, რომელიც ხელმძღვანელობას გაუწევს ყველა იმ ზომას, რომელიც არჩევნების გაყალბების თავიდან ასარიდებლადაა შექმნილი;
  2. შტაბი წარმოადგენს კონკრეტული ღონისძიებების ნუსხას, თუ რა უნდა გაკეთდეს ამომრჩეველთა ხმების დასაცავად, პარტიებს შორის შეიქმნება საერთო მონაცემთა ბაზა, სადაც არჩევნების დღეს აისახება ყველა დარღვევა და ასევე იქმნება საერთო საკოორდინაციო მექანიზმი, თუ როგორ მოახერხებენ პარტიები დარღვევებზე რეაგირებას;
  3. მათ მიერ შექმნილი სტრუქტურა მჭიდროდ ითანამშრომლებს არასამთავრობო სექტორთან და დიპლომატიურ კორპუსთან.

ბაქრაძის თქმით, შტაბში წარმომადგენელი ყველა პარტიას ეყოლება.

"თითოეული ხმის დასაცავად" — ამ მიზნითა და საარჩევნო მანიპულაციების გამოსარიცხად, ოპოზიციურმა პარტიებმა მემორანდუმს მოაწერეს ხელი. ოპოზიციაში აცხადებენ, რომ კოორდინირებულად იმუშავებენ ყველა ოლქში, მათ შორის იქაც, სადაც ერთმანეთს კონკურენტი დაუყენეს.

მათივე განცხადებით, ერთობლივად და შეთანხმებულად იმუშავებენ საერთაშორისო დამკვირვებლებთან, რათა არჩევნების ლეგიტიმურობის გარშემო არ გაჩნდეს კითხვის ნიშნები.

ლეიბორისტული პარტიის ლიდერის, შალვა ნათელაშვილის განცხადებით, ეს ისტორიული მოვლენაა და ნიშნავს იმას, რომ მმართველი ელიტა უნდა შეეგუოს ძალაუფლებაში ვერდარჩენის პერსპექტივას, რადგან ვერცერთ ხმას ვერ გააყალბებენ. ნინო ბურჯანაძდემ მოუწოდა ოპოზიციის იმ ლიდერებს, "ვისაც ივანიშვილის ხელისუფლების ცვლილება სურს", განსხვავებული შეხედულებების მიუხედავად, მოაწერონ ხელი ამ მემორანდუმს.

გაიგეთ მეტი: