ევროპული საქართველოს მაჟორიტარობის კანდიდატი ვაკეში, ელენე ხოშტარია ბელარუს ხალხს სოლიდარობას უცხადებს. ის დღეს, თბილისში გამართულ აქციაზეც იმყოფებოდა, სადაც ადამიანებმა ცოცხალი ჯაჭვი შეკრეს ლიეტუვას საელჩოდან ბელარუსის საელჩომდე.

ელენე ხოშტარიას თქმით, მნიშვნელოვანია იმის გაცნობიერება, რომ ეს ბრძოლა არ არის მხოლოდ ბელარუსი ხალხისთვის და რომ ეს არის ბრძოლა თავისუფლებისათვის. მისი თქმით, ამ ბრძოლით ინგრევა საბჭოთა კავშირის ნარჩენები.

"სოლიდარობა ბელარუს ხალხს, რომელიც დღეს თავისუფლებისთვის სიცოცხლის ფასად იბრძვის. ეს ჩვენი ბრძოლაც არის, იმიტომ, რომ ინგრევა საბჭოთა კავშირის ნარჩენები. მსოფლიოს ამ ნაწილში აღარ უნდა დარჩენ დიქტატორები, არჩევნების გაყალბებას ჩაბღაუჭებული მოძალადეები", — განაცხადა ელენე ხოშტარიამ.