საქართველოს კომუნიკაციების ეროვნულმა კომისიამ შპს დიჯითალ ედსს, რომელიც შპს აიმუვის.ჯის 60 პროცენტის მფლობელია, ამავე კომპანიის დარჩენილი წილისა და სააქციო საზოგადოება ITDC-ის 51 პროცენტის შესყიდვაზე თანხმობა მისცა. აღნიშნულ საკითხზე თანხმობა კომპანიებმა 15 დეკემბერს გამართულ სხდომაზე მიიღეს.

შპს აიმუვის.ჯი ვებგვერდ iMovies.ge-ს ფლობს, ITDC კი მის კონკურენტს - Myvideo.ge-ს. ვებგვერდები თემატურად მსგავსია. გარდა ვიდეოპროდუქციისა, ორივე ვებგვერდზე შესაძლებელია სატელევიზიო არხების პირდაპირი ტრანსლაციის ყურება. გარდა ამისა, კომპანია ITDC-ს საქმიანობის სფეროებია: ვებგვერდების, საინფორმაციო სისტემების შექმნა, IT სტრატეგიის ფორმირება და რეკომენდაციების შემუშავება.

კომპანიების წილების ცვლილებებამდე - ITDC-ს მფლობელები არიან: ააიპ ტექნოლოგიების განვითარების ცენტრი (10%), მამუკა მონავარდისაშვილი (35%), გიორგი გარსევანიშვილი (35%) და გურამ ხუნდაძე (20%), შპს აიმუვის.ჯი კი - შოთა ჩლაიძესა (40%) და შპს დიჯითალ ედსს (60%) ეკუთვნით.

იმ შემთხვევაში, თუ კომპანიებს შორის გარიგება შედგება, მათ წილების ცვლილების შესახებ ინფორმაცია საქართველოს კომუნიკაციების ეროვნულ კომისიაში უნდა წარადგინონ. ცვლილებების შემდეგ დიჯითალ ედსი სრულად გახდება აიმუვის.ჯისა და ITDC-ს აქციების 51%-ს მფლობელი. უცვლელი დარჩება შპს დიჯითალ ედსის მფლობელები. დღევანდელი მდგომარეობით, ამ კომპანიის 12,5-პროცენტიან წილებს გივი გურასპაული, ნიკოლოზ გაბელაია, ანდრო კიკნაძე და კონსტანტინე ჭავჭანიძე ფლობენ, დარჩენილი 51% კი ლევან ჭიორელიძეს ეკუთვნის.