2020 წლის საპარლამენტო არჩევნებისთვის გაერთიანებულმა ოპოზიციამ ახალი დეკლარაცია მიიღო, რომელიც ერთმანეთის ხმების დაცვას განაპირობებს. ისინი ყველა ოლქში კოორდინირებულ მუშაობაზე და კონკრეტული მექანიზმების შემუშავებაზე შეთანხმდნენ.

"ოპოზიციური პარტიები კოორდინირებულად ვიმუშავებთ ყველა ოლქში, მათ შორის იქაც, სადაც ერთმანეთს კონკურენტი კანდიდატები დავუყენეთ. პარტიების ამოცანა არა ცალკეული პოლიტიკური გემოვნების ამომრჩეველთა ხმების დაცვა, არამედ მთელი საარჩევნო პროცესის გამჭვირვალობისა და თითოეული მოქალაქის არჩევანის დაცვა იქნება. ამ ამოცანის მისაღწევად ჩვენ ვაპირებთ თანამშრომლობის კონკრეტული მექანიზმების შემუშავებას", — წერია დეკლარაციაში.

გაერთიანებული ოპოზიცია მიიჩნევს, რომ არჩევნების გზით, მშვიდობიანად ხელისუფლების შეცვლა არის ის ერთადერთი სწორი გზა, რომელიც საშუალებას მისცემს საზოგადოებას, განაგრძოს სვლა დასავლური დემოკრატიული სახელმწიფოს მშენებლობისკენ.

მათი თქმით, ივანიშვილის რეჟიმს მობილიზებული აქვს როგორც ადმინისტრაციული, ისე ფინანსური რესურსის დიდი ნაწილი, სახელმწიფო ინსტიტუტები კი საზოგადოების ნაცვლად მმართველი გუნდის ინტერესებს ემსახურება. სწორედ ამიტომ, ოპოზიცია მნიშვნელოვნად მიიჩნევს დემოკრატიული ოპოზიციის კოორდინირებულ მუშაობას თითოეული ხმის დასაცავად და საარჩევნო მანიპულაციების გამოსარიცხად. გაერთიანებული ოპოზიცია ამბობს იმასაც, რომ არჩევნების ლეგიტიმურობის უზრუნველსაყოფად ითანამშრომლებენ საერთაშორისო დამკვირვებლებთანაც.

დღეს ცნობილი გახდა, რომ გაერთიანებული ოპოზიცია დიდუბე-ჩუღურეთის მაჟორიტარულ ოლქში ზურაბ ჯაფარიძეს დაუჭერს მხარს, საბურთალოზე კი — ირაკლი ოქრუაშვილს. ჯაფარიძე მმართველი პარტიიდან გია ვოლსკის, ხოლო ოქრუაშვილი — დავით სერგეენკოს დაუპირისპირდება.