ევროპული საქართველოს დეპუტატმა, გიორგი კანდელაკმა ბელარუსში მიმდინარე მოვლენები შეაფასა და აღნიშნა, რომ ამ ყველაფერს დიდი გეოპოლიტიკური შედეგები ექნება ჩვენს რეგიონში.

"თუკი წარმატებული აღმოჩნდება ეს დემოკრატიული ტრანსფორმაცია, ძალიან ბევრი უპირატესობა აქვს, რის გამოც იგი, შედარებით, მალე შეძლებს, რომ გაერთიანდეს ცივილიზებული ქვეყნების ოჯახში, მათ შორის, ევროკავშირში. გარდა გეოგრაფიისა, იქ პატარა არის კორუფცია, იქ არ ყოფილა კატაკლიზმები, ამიტომ მოველი, რომ უზარმაზარი ინვესტიციები წამოვა, იქ მუშაობს ინდუსტრია", — ამბობს კანდელაკი.

მან ამის შესახებ ფორმულას ეთერში ილაპარაკა, და აღნიშნა, რომ ბელარუსის ტრანსფორმაციას დიდი გავლენა ექნება რუსეთის მომავალზეც და იგი "დაასამარებს" რუსული პროპაგანდის მიერ შეთხზულ მითებს.

"ბელარუსის დემოკრატიულმა ტრანსფორმაციამ უკვე დაამტკიცა, რომ ის მითი, რასაც ემყარება პუტინის ხელისუფლება, რომ სრულფასოვანი დემოკრატია, კანონის უზენაესობა, ადამიანის უფლებები ამ სივრცეზე, რომელზეც ერთ დროს ბატონობდა საბჭოთა კავშირი, ბოროტების იმპერია, შეუძლებელია, ამას დაასამარებს ბელარუსი, რომ ეს არის სისულელე და აბსურდი და იმასაც, რომ დემოკრატია და კანონის უზენაესობა და ადამიანის უფლებები სრულფასოვნად ვერ იმუშავებს მართლმადიდებლულ ქვეყნებში, რუსული პროპაგანდის მიერ შეთხზული მითი ესეცაა და ამასაც საბოლოოდ დაასამარებს ბელარუსი", — აღნიშნა კანდელაკმა.

ლუკაშენკოს წინააღმდეგ და ხელახალი სამართლიანი არჩევნების მოთხოვნით მრავალათასიანი აქციები მინსკში დღემდე არ წყდება.

მასშტაბური საპროტესტო აქციები ქვეყნის ყველა ქალაქში მიმდინარეობს და გაფიცვებში ყველა მსხვილი საწარმოა ჩართული. პროტესტი მას შემდეგ დაიწყო, რაც საპრეზიდენტო არჩევნების დროს კვლავ ლუკაშენკოს გამარჯვების შესახებ შედეგები გამოქვეყნდა. ლუკაშენკო ქვეყანას 26 წელია მართავს.

ადგილობრივი მედიის ცნობით, აქციების მიმდინარეობისას პოლიციამ აქციის ათასობით მონაწილე დააკავა. გავრცელდა ინფორმაცია ორი დაღუპულის შესახებაც.