ლუკაშენკოს თქმით, რუსეთმა ბელარუსის უსაფრთხოების უზრუნველსაყოფად დახმარება შესთავაზა. ბელარუსში მიმდინარე აქციების ფონზე, რომელიც ლუკაშენკოს მორიგი ვადით პრეზიდენტად არჩევას მოჰყვა, პრეზიდენტმა პირობა დადო, რომ კრიზისი ცალმხრივად, რუსეთის დახმარებით მოგვარდება. ამის შესახებ განცხადება ლუკაშენკომ შაბათს საღამოს, რუსეთის პრეზიდენტ, ვლადიმერ პუტინთან სატელეფონო საუბრის მერე გაავრცელა.

"მქონდა გრძელი და არსებითი საუბარი რუსეთის პრეზიდენტთან..შევთანხმდით, რომ ჩვენი თავდაპირველი მოთხოვნის თანახმად, ბელარუსის უსაფრთხოების დასაცავად სრულ დახმარებას მივიღებთ. რაც შეეხება სამხედრო საკითხებს, ჩვენ რუსეთთან შეთანხმება გვაქვს, როგორც კოლექტიური უსაფრთხოების ხელშეკრულების ორგანიზაციის ნაწილს (CSTO). ხოლო ამგვარი სიტუაციები სწორედ ამ შეთანხმებას ემყარება", — განაცხადა ლუკაშენკომ.

CSTO არის მთავრობათაშორისი შეთანხმება რუსეთსა და პოსტ საბჭოთა ქვეყნებს შორის, რომელიც ძალაში 1994 წელს შევიდა.

კრემლის განცხადების თანახმად, შაბათს, ორ პრეზიდენტს შორის გამართული დიალოგის შედეგად, პუტინმა განაცხდა, რომ ბელარუსში მიმდინარე არეულობა მალე მოგვარდება.

"ეს პრობლემა არ უნდა გამოიყენონ იმ დესტრუქციულმა ძალებმა, რომლებიც ცდილობენ, ორ ქვეყანას შორის ურთიერთობას ზიანი მიაყენონ", — ნათქვამია კრემლის განცხადებაში.

ამ სატელეფონო საუბრის გამართვამდე ლუკაშენკო აცხადებდა, რომ ბელარუსს ჰყავდა ისეთი მთავრობა, რომელიც პრობლემას დამოუკიდებლად მოაგვარებდა. ამბობდა, რომ მათ უცხო ქვეყნის მთავრობა და შუამავალი არ სჭირდებოდათ.

პუტინთან საუბრის შემდეგ, დღეს ლუკაშენკო თავისი მხარდამჭერების მიერ გამართულ მიტინგზე მივიდა და იმ წარმატებაზე ისაუბრა, რასაც ბელარუსი მთავრობამ საბჭოთა კავშირის დაშლის შემდეგ მიაღწია.

"თქვენ მე, სრულიად ახალგაზრდასა და გამოუცდელს, მთხოვეთ, მეხსნა ხალხი უფსკრულისგან. ჩვენ ეს გავაკეთეთ. ჩვენ გავაკეთეთ ის, რაზეც მილიონობით წინამორბედი ოცნებობდა. ჩვენ, პირველად ისტორიაში, ავაშენეთ დამოუკიდებელი და სუვერენული სახელმწიფო" — განაცხადა ლუკაშენკომ.

აქვე, 9 აგვისტოს ბელარუსში საპროტესტო გამოსვლები საპრეზიდენტო არჩევნებს მოჰყვა. გამოსვლები გვიან ღამით, მას შემდეგ დაიწყო, რაც წინასწარი დათვლის შედეგად ცნობილი გახდა, რომ ალექსანდრ ლუკაშენკომ ხმების 80 პროცენტი მიიღო, ხოლო სვეტლანა ტიხანოვსკაიამ — 10 პროცენტი.

არჩევნების შედეგების გასაპროტესტებლად გამოსული მოსახლეობა პოლიციამ რეზინის ტყვიებისა და წყლის ჭავლის გამოყენებით დაშალა. ხალხის ნაწილი დაშავდა, ათასობით ადამიანი კი პოლიციამ დააკავა. საპროტესტო აქციების დროს ორი ადამიანი გარდაიცვალა.