თბილისის ბაგა-ბაღების მართვის სააგენტოს ხელმძღვანელის, კახაბერ გვანცელაძის ინფორმაციით, თბილისის საჯარო ბაღებში სასწავლო პროცესის განახლება 14 სექტემბრიდან იგეგმება. მისივე თქმით, ამ ეტაპზე მიმდინარეობს მუშაობა კონკრეტულ პროტოკოლსა და რეგულაციებზე, რომელთა დაცვაც ბაღებს მოუწევთ.

"მიმდინარე ეპიდსიტუაციიდან გამომდინარე, ჩვენ ვგეგმავთ 14 სექტემბერს განვაახლოთ სააღმზრდელო-სასწავლო პროცესი და ვფიქრობთ, რომ შევხვდებით ყველანაირი უსაფრთხოების ნორმების დაცვით. ამ ეტაპზე მიმდინარეობს ჯანდაცვის სამინისტროსა და შრომის ინსპექციასთან მუშაობა კონრეტული პროტოკოლისა და რეგულაციების შესახებ, რომელიც მოგვიანებით გაჟღერდება", — განაცხადა კახაბერ გვანცელაძემ.

მისივე თქმით, ბაგა-ბაღებში ბავშვების გადანაწილების მეთოდზე ჯერჯერობით სამუშაო ვერსია არსებობს, ოფიციალური დოკუმენტი კი რეგულაციებისა და პროტოკოლის შესახებ უახლოეს პერიოდში იქნება.

გვანცელაძე ასევე აღნიშნავს, რომ ბაგა-ბაღებში ყველა დეტალი იქნება გათვალისწინებული ბავშვების უსაფრთხოებისთვის.