საქართველოს პრეზიდენტის ადმინისტრაციის ხელმძღვანელმა, გიორგი აბაშიშვილმა 12 დეკემბერს გამართულ საგანგებო ბრიფინგზე განაცხადა, რომ პრეზიდენტი და მისი წარმომადგენლები პარლამენტის მიერ წარმოდგენილ საკონსტიტუციო კომისიაში მონაწილეობის მიღებისგან "თავს შეიკავებენ".

მისივე განმარტებით, წარმოდგენილი კომისიის შექმნის წესი ბევრ კითხვის ნიშანს აჩენს და მასში მეტი აქცენტია ერთპიროვნულ და ერთპარტიული გადაწყვეტილებები მიღებაზე:

"საქართველოს პარლამენტის მხრიდან შემოთავაზებული წინადადება საკონსტიტუციო კომისიის შექმნის წესის შესახებ, ვფიქრობ არაერთ კითხვის ნიშანს აჩენს. წარმოდგენილი დადგენილების პროექტი ცალსახად მოკლებულია პოლიტიკურ ნდობას და ლეგიტიმაციას, საკითხთა განხილვის დემოკრატიულობას და არ არის ორიენტირებული ფართო კონსენსუსის მიღწევაზე, უფრო მეტიც, აქ მეტი აქცენტია ერთპიროვნულ და ერთპარტიული გადაწყვეტილებები მიღებაზე. შესაბამისად საქართველოს პრეზიდენტი და პრეზიდენტის წარმომადგენლები თავს შეიკავებენ საკონსტიტუციო კომისიაში მონაწილეობის მიღებისაგან".

9 დეკემბერს ცნობილი გახდა, რომ საკონსტიტუციო კომისიას პარლამენტის თავმჯდომარე უხელმძღვანელებს. ირაკლი კობახიძისთვის საკონსტიტუციო კომისიის ლეგიტიმაციასთან დაკავშირებით დასმული კითხვები მიუღებელია.

გიორგი მარგველაშვილმა მეცხრე მოწვევის პარლამენტის პირველ სხდომაზე გიორგი კვირიკაშვილს საკონსტიტუციო კომისიის განსხვავებული ფორმატი, პრეზიდენტის, პრემიერ-მინისტრისა და პარლამენტის თანათავმჯდომარეობით შესთავაზა.

22 ნოემბერს, პრეზიდენტის პრესსპიკერმა განაცხადა, რომ მმართველმა გუნდმა მარგველაშვილის შეთავაზებაზე უარი თქვა.