რაჭაში სტიქიის შედეგების ლიკვიდაციისთვის ოპერატიული შტაბი შეიქმნა, რომელსაც რაჭა-ლეჩხუმისა და ქვემო სვანეთის გუბერნატორის მოადგილე, ლევან ქვათაძე უხელმძღვანელებს. შტაბი პრემიერის დავალებით შეიქმნა.

მთავრობის ადმინისტრაციის ინფორმაციით, სტიქიის სალიკვიდაციო სამუშაოებში ჩართულია მძიმე ტექნიკა. მამისონის ერთ-ერთ დაზიანებულ მონაკვეთზე უკვე მოწყობილია შემოვლითი გზა, მიმდინარეობს დამატებითი ტექნიკის მობილიზება, თუმცა სამუშაოების შესრულებას რთული რელიეფი აფერხებს.

პირველადი ინფორმაციით, სტიქიის შედეგად დაზიანებულია 10 ხიდი, 8 ადგილას ჩანგრეულია ცენტრალური გზის სავალი ნაწილი, ასევე, რამდენიმე მონაკვეთი ონიდან შოვის მიმართულებით და შიდა სასოფლო გზები. სტიქიის ზონაში მობილიზებულია 12 ერთეული ტექნიკა, ექსკავატორები, ბულდოზერები.

მათივე თქმით, ონის მუნიციპალიტეტის მოსახლეობისთვის აღდგენილია დროებითი წყალმომარაგება, მაგისტრალური ქსელის დაზიანების შედეგად წყლის გარეშე დარჩენილ 400 აბონენტს სასმელი წყალი ცისტერნებით მიეწოდება.

სტიქიის ზონიდან ჩარჩენილი მოსახლეობა გამოჰყავთ. ადმინისტრაციაში აცხადებენ, რომ ვერტმფრენით გადმოყვანილია 30-ზე მეტი მოქალაქე. ამასთან, სტიქიის ზონაში დარჩენილ მოქალაქეებს, საჭიროების შესაბამისად, ადგილზე მიეწოდათ მედიკამენტები და საკვები პროდუქტები.