აშშ-ის სატანისტურ ტაძარს სურს, სკოლადამთავრებულებს უმაღლესი განათლების მიღებაში დაეხმაროს და "ეშმაკის ადვოკატის სტიპენდიას" აცხადებს.

ამერიკული ორგანიზაცია The Satanic Temple (სატანისტური ტაძარი), რომელიც რელიგიისა და საერო საქმეების სეკულარიზმისთვის იბრძვის, გულდასმით გადახედავს 2020 წლის სკოლადამთავრებულების განაცხადებს და $500-იანი სტიპენდიის ორ გამარჯვებულს გამოაცხადებს.

მსურველებმა კრეატიული ესე, პოემა, ხელოვნების რამე ნიმუში ან ფილმი უნდა გაგზავნონ და ორი კითხვიდან ერთ-ერთს გასცენ პასუხი.

პირველი შეკითხვაა, თუ რა გაუკეთებია აპლიკანტს ტაძრის მიზნებისა და მისიის ხელშესაწყობად. მეორე შეკითხვა კი ითხოვს იმ მასწავლებლის აღწერას, რომელმაც "გათელა თქვენი სული, ძირი გამოუთხარა თქვენს თავდაჯერებულობას და შეგაძულათ თითოეული ის წუთი, რომლის სკოლაში გატარებაც გევალებოდათ".

სტიპენდიისთვის აპლიკაციების მიღება ორშაბათს, 20 ივლისს, დაიწყო. ორგანიზაციის თანადამფუძნებელმა მალკოლმ ჯერიმ CNN-ს ოთხშაბათს განუცხადა, რომ უკვე 50 აპლიკაცია იყო შემოსული.

იდეა მაშინ დაიბადა, როდესაც ერთმა სკოლის მოსწავლემ ჯერის ელექტრონული წერილი მისწერა, რომელშიც ის მას სკოლის რელიგიური სტიპენდიისთვის რეკომენდაციის გაწევას სთხოვდა.

"გული დამწყდა, როცა სტიპენდია ვერ მოიპოვა, და მივხვდი, იმის შესაძლებლობა მქონდა, რომ მისთვის ჩემი სტიპენდია შემეთავაზებინე, რომელიც ჩვენს ღირებულებებს ასახავს. ეს [სტიპენდია] მოსწავლეებს საშუალებას მიცემს, კრიტიკულები იყვნენ იმ ინსტიტუციის მიმართ, რომელიც მხოლოდ მლიქვნელურ თაყვანისცემას აჯილდოებს", — თქვა მან.

ფოტო: Giphy

ჯგუფი, რომლის სათავო ოფისიც მასაჩუსეტსის შტატის ქალაქ სალემში მდებარეობს, ამბობს, რომ მისი მისიაა "ადამიანებში კეთილმოსურნეობა და თანაგრძნობა წაახალისოს". წევრების რწმენით, სატანა რეალური არსება კი არა, "ლიტერატურული კონსტრუქტია".

სატანისტური ტაძრის ვებსაიტზე წერია, რომ ჯგუფი "ცოდნისკენ სწრაფვას" იცავს, თუმცა მას სჯერა, რომ ადამიანებს სწავლა და განათლება ერთმანეთში ერევათ. "მოსწავლეებისგან ხშირად ელიან სკოლის ქებას, მიუხედავად იმისა, რომ მრავალ მოსწავლეს სკოლის ადმინისტრაცია, სასწავლო განყოფილება და სხვა თანამშრომლები ძალიან უსინდისოდ ეპყრობიან", — ამბობს ჯერი.

"ხშირად გვესმის ხოლმე, როგორ აქებს წარმატებული ადამიანი თავის მასწავლებელს, რომელმაც ის შთააგონა, თუმცა ისინი ვერასდროს ხვდებიან, რომ სკოლაში 13-წლიანი განათლების მიღების შემდეგ მათ ძალიან გაუმართლათ, ასეთ ერთ მასწავლებელს მაინც რომ გადაეყარნენ", — დაამატა ორგანიზაციის თანადამფუძნებელმა.

სტიპენდიაზე განაცხადები 31 აგვისტომდე მიიღება. გამარჯვებულები ტაძრის ვებსაიტზე გამოვლინდებიან 15 სექტემბერს.