საქართველოს პირველმა ვიცე-პრემიერმა, ფინანსთა მინისტრმა, დიმიტრი ქუმსიშვილმა და საქართველოში ვიზიტით მყოფმა ევროპის საინვესტიციო ბანკის ვიცე-პრეზიდენტმა, იან ვაპავუორიმ, ხელს მოაწერეს სამ ფინანსურ ხელშეკრულებას, რომლის საფუძველზეც, საქართველო, ჯამში, 450 მილიონი ევროს ოდენობის შეღავათიან ფინანსურ რესურსს მიიღებს.

უწყების ცნობით, საქართველო სხვადასხვა დარგში გადაანაწილებს მიღებულ თანხას:

სატრანსპორტო კომუნიკაციის პროექტის ხელშეკრულების ფარგლებში, საქართველო 250 მილიონ ევროს ოდენობის ფინანსურ რესურსს მიიღებს. საქართველოს რეგიონებში საქართველოს მთავრობის მიერ განსაზღვრული საავტომობილო გზების გაუმჯობესების პროექტები, მათ შორისაა, აღმოსავლეთ-დასავლეთის სატრანზიტო მაგისტრალის უბისა-შორაპანისა და გრიგოლეთი-ფოთის მონაკვეთები.

მუნიციპალური ინფრასტრუქტურის აღდგენის პროექტის ხელშეკრულება 100 მილიონი ევროს ოდენობის ფინანსური რესურსის მიღებას ითვალისწინებს, რომელიც ქვეყნის სხვადასხვა რეგიონში მცირე ზომის ინფრასტრუქტურული პროექტების (გზების, ქუჩების, წყალსადენის, კანალიზაციის სისტემების რეაბილიტაცია და სხვა) დაფინანსებას მოხმარდება.

სოფლის მეურნეობის პროდუქციის წარმოება/გადამუშავება/რეალიზაციის ჯაჭვის პროექტი 100 მილიონ ევროს ოდენობის გამოყოფას ითვალისწინებს. პროექტის ფარგლებში, დაფინანსდება სოფლის მეურნეობის სექტორში პროექტები სოფლის მეურნეობის პროდუქციის წარმოების/გადამუშავების/რეალიზაციის ჯაჭვის შექმნის მიზნით.

ხელმოწერის ცერემონიას დაესწრნენ საქართველოს პრემიერ-მინისტრი გიორგი კვირიკაშვილი, ევროკავშირის ელჩი საქართველოში იანოშ ჰერმანი, მთავრობის წევრები და ევროპის საინვესტიციო ბანკის წარმომადგენლები.