თეთრი ხმაურის მოძრაობა 10 დეკემბერს, ადამიანის უფლებების დაცვის დღეს, თბილისში აქციას, სახელწოდებით დეკრიმინალიზაცია 2016, გამართავს.

"ეს იქნება ბოლო მშვიდობიანი აქცია, რომელსაც თეთრი ხმაურის მოძრაობა გამართავს, თუ ყველაფერი დაპირებისამებრ არ წავა. აუცილებელი, გარდაუვალი და დადებითი ცვლილებების მოლოდინი არსებობს და ვიმედოვნებთ ასეც წავა საქმე" - წერს მოძრაობის აქტივისტი ბექა წიქარიშვილი ფეისბუკზე.

მისი თქმით, თუ პროცესები კარგი მიმართულებით განვითარდება, დეკრიმინალიზაცია გარდაუვალია, რასაც კარგ რეფორმები მოჰყვება. თუმცა, იმ შემთხვევაში, თუ მათ მიერ მოთხოვნილი ცვლილებები არ განხორციელდება, წიქარიშვილის თქმით, ისინი რადიკალურ გზებს მიმართავენ:

"თუ სცენარი რთულად წავა, ეს ნიშნავს უდანაშაულოდ დაჭერილების ტრაგედიებს, სოციალური უთანასწორობის ზრდას, მძიმე ფონს და მოსახლეობის აგრესიის მატებას, სანაცვლოდ კი შსს-ს თანამშრომლების ზემუნდირიზაციას და პოლიციური სახელმწიფოს სტატუს კვოს შენარჩუნებას. ეს სცენარი გულისხმობს იმ ადამიანების რადიკალიზაციას, რომლებსაც აღარაფერი აქვთ დასაკარგი რადგან ატომური ბომბის დამზადება და 1 გრ. ნებისმიერი ნარკოტიკული საშუალების ფლობა ჩვენი სამარცხვინო კანონმდებლობით იდენტური სიმძიმის სასჯელებია. პირადად მე ამას ვერ შევეგუები და ნებისმიერი დაუმორჩილებობის/წინააღმდეგობის ფორმისთვის მზად ვარ".

წიქარიშვილის თქმით, ათასობით და ათიათასობით მოქალაქე აცნობიერებს ქვეყანაში არსებული ნარკოპოლიტიკის მდგომარეობას.

აქციის მოთხოვნები ასე გამოიყურება.

  • მოვითხოვთ ყველა ნარკოტიკული საშუალების მოხმარების უპირობო დეკრიმინალიზაციას!
  • მოვითხოვთ ბოდიშს 10 წლიანი წნეხის გამო!
  • მოვითხოვთ ზრუნვას და არა დასჯას!

დეკრიმინალიზაცია 2016 ხვალ 5 საათზე პარლამენტის შენობის წინ გაიმართება.