ნაციონალური მოძრაობის წევრი, დავით ბაქრაძე მიიჩნევს, რომ დღეს, 14 მაისს, საკონსტიტუციო სასამართლოს შესახებ კანონში შეტანილი ცვლილებები ხელისუფლებას საშუალებას მისცემს გააკონტროლოს საკონსტიტუციო სასამართლო. ამის შესახებ ბაქრაძემ ნაციონალური მოძრაობის ოფისში გამართულ ბრიფინგზე განაცხადა.

ბაქრაძის განმარტებით, ხელისუფლების მხრიდან აღნიშნული კანონპროექტის ფორსირებულ რეჟიმში განხილვის მიზეზი რუსთავი 2-ის საქმეა:

"ხელისუფლება აგრძელებს ორკესტრირებულ შეტევას რუსთავი 2-ის წინააღმდეგ და ამ პროცესში ის იყენებს სასამართლოს, მის მიერ კონტროლირებადი მოსამართლეების მეშვეობით. მთელ ამ პროცესში ერთადერთ დამოუკიდებელ ინსტიტუტად, რომელმაც ხელი შეიძლება შეუშალოს რუსთავი 2-ის წაღებასა და გაკონტროლებაში, დღემდე რჩება საკონსტიტუციო სასამართლო".

ბაქრაძის განმარტებით, სწორედ ზემოაღნიშნულია იმის მიზეზი, რომ დღეს პარლამენტში გამართულ სხდომას ნაციონალური მოძრაობა არ დაესწრო:

"ჩვენი ბრძოლა გრძელდება. ხელისუფლებას არც რუსთავი 2-ის ხელში ჩაგდების, არც საკონსტიტუციო სასამართლოს გატეხვის და დაკნინების შესაძლებლობას მივცემთ".

ბაქრაძემ ასევე მოუწოდა პრეზიდენტს, ვეტო დაადოს აღნიშნულ კანონს.