რესპუბლიკური პარტიის ერთ-ერთი ლიდერის, ხათუნა სამნიძის თქმით, სასამართლოს გადაწყვეტილებით, მათ პარტია 2020 წლის არჩევნებისთვის რეგისტრაციას შეძლებს. ამის შესახებ მან ფეისბუქზე დაწერა.

"სასამართლომ დააკმაყოფილა რესპუბლიკელების სარჩელი. ვრეგისტრირდებით საარჩევნოდ", — წერს იგი.

გუშინ, 19 ივლისს ცნობილი გახდა, რომ ცენტრალურმა საარჩევნო კომისიამ რესპუბლიკურ პარტიას საპარლამენტო არჩევნებისთვის რეგისტრაციაზე უარი უთხრა. კომისია მიზეზად რეგისტარციის ვადისთვის გადაცილებას ასახელებდა, თუმცა პარტიაში აცხადებდნენ, რომ ვადები არ დაურღვევიათ.

On.ge-სთან საუბრისას პარტიის ერთ-ერთ ლიდერი, თამარ კორძაია განმარტავდა, რომ საარჩევნო კოდექსში შესული ცვლილებების თანახმად, პარტიები, რომლებსაც პარლამენტში წარმომადგენელი არ ჰყავთ 15 ივლისამდე, 14 ივლისის ჩათვლით უნდა დარეგისტრირებულიყვნენ. მისი თქმით, ცესკოს თავმჯდომარის სახელზე წერილი ფოსტით, ვადის დაცვით, 14 ივლისს გაგზავნეს. მისივე თქმით, ფოსტამ წერილი მეორე დღეს, 15 ივლისს მიიტანა და ცესკომ ეს მიიჩნია დარღვევად.

"სხვა განმარტება წარდგენის ფორმასთან დაკავშირებით არ არსებობს. ცვლილებებში არ წერია რომ უნდა მიხვიდე პირადად და არ შეიძლება ფოსტით გაგზავნა", — აღნიშნა მაშინ კორძაია.

პარტიამ ცესკოს გადაწყვეტილების გასაჩივრების მოთხოვნით სასამართლოს მიმართა.