ბრენდონ კრონენბერგი თავისი სარეჟისორო დებიუტის, Antiviral-ის, პრემიერიდან რვა წლის შემდეგ, 2020 წელს, სანდენსის კინოფესტივალზე ახალი პროექტით დაბრუნდა. ეს პროექტია საზარელი საშინელებათა ფილმი და თრილერი Possessor, რომელშიც მთავარ როლებს ანდრეა რაიზბორო და კრისტოფერ ებოტი ასრულებენ.

ფილმში რაიზბორო ტასია ვოსის როლს შეასრულებს — ის კორპორაციული აგენტია, რომელიც სხვათა სხეულების დასაპატრონებლად და კომპანიის საკეთილდღეოდ მკვლელობების ჩასადენად ტვინში იმპლანტაციის ტექნოლოგიას იყენებს.

"მართალია, ტასიას მუშაობის გამორჩეული ნიჭი აქვს, მაგრამ სამსახურში მიღებულმა გამოცდილებებმა ის ძლიერ შეცვალა. პირად ცხოვრებაში მას ძალიან უჭირს ძალადობრივი მოგონებებისა და სურვილების დათრგუნვა. მენტალური დაძაბულობის ზრდასთან ერთად ის კონტროლს კარგავს და კაცის (კრისტოფერ ებოტის) გონებაში მოემწყვდევა, რომლის იდენტობაც მისი პიროვნების გაქრობის საფრთხეს ქმნის", — ნათქვამია სანდენსის კინოფესტივალის მიმოხილვაში.

Possessor ამ წლის მიწურულს გამოვა. იხილეთ ახალი საშინელებათა თრილერის პირველი ტრეილერი ქვემოთ:

Possessor-ში კრონენბერგი სამეცნიერო ფანტასტიკის საშინელებათა ფილმების იმავე გარემოს გვთავაზობს, როგორიც Antiviral-ში ჰქონდა, თუმცა ამჯერად ე.წ. ბოდი-ჰორორი ადამიანის სხეულის დამახინჯების ისეთ სისხლიან უკიდურესობებამდეა აყვანილი, რომ რეჟისორის მამა დეივიდ კრონენბერგი — ასევე ცნობილი რეჟისორი და ამ ჟანრის ერთ-ერთი შემქმნელი — ნამდვილად უნდა ამაყობდეს.

"ანდრეა რაიზბოროსა და კრისტოფერ ებოტის 90-წუთიანი საოცრად სისხლიანი ფსიქიკური ორთაბრძოლა ამ უკანასკნელის სხეულის დასაპატრონებლად იმაზე უფრო სასიამოვნო საყურებელია, ვიდრე წლევანდელი საუკეთესო ფილმის ნომინანტების უმეტესობამ შემოგვთავაზა... Possessor თქვენი გონების დაპატრონებას ვერ ახერხებს, თუმცა ის წარმოუდგენლად კარგად გიძვრებათ კანში", — თქვა კინოკრიტიკოსმა დეივიდ ერლიჩმა.