პარლამენტში სპორტისა და ახალგაზრდობის კომიტეტის თავმჯდომარე, მიხეილ ყაველაშვილი მოსკოვურ კლუბ ცსკა-ში ქართველი კალათბურთელისა და ნაკრების კაპიტნის, თორნიკე შენგელიას გადასვლას გამოეხმაურა. ყაველაშვილი შენგელიას წარმატებას უსურვებს და სოლიდარობას უცხადებს.

"დააკვირდით შემადგენლობას, თუ ეს ცსკა არის, რატომ თამაშობენ აქ დაახლოებით 4-5 ამერიკელი, 2 ლიტვის მოთამაშე, ლატვიელი კალათბურთელები თამაშობენ და არ შეიძლება ქართველმა კალათბურთელმა ითამაშოს?

თორნიკე შენგელიამ მოქალაქეობა დათმო? ქართველობა დათმო, თუ რაზე არის საუბარი? ის არის საქართველოს ნაკრების კაპიტანი. საქართველოს ნაკრები როცა ეთამაშება ნებისმიერ მოწინააღმდეგეს, ის იქნება საქართველოს ნაკრების რიგებში და არანაკლებ სხვა კალათბურთელებისა ის დაიხარჯება, როგორც იხარჯებოდა და საამაყოა. ჩემთვის საამაყოა ეს ადამიანი", — განაცხადა ყაველაშვილმა.

ამ თემას გამოეხმაურა საქართველოს პრეზიდენტიც და შენგელიას გადაწყვეტილებას მიუღებელი და სამწუხარო უწოდა.

თორნიკე შენგელიას გადასვლაზე ინფორმაცია რამდენიმე თვეა ვრცელდება, თუმცა აქამდე არ დადასტურებულა. 7 ივლისს ამ საკითხს შენგელიაც გამოეხმაურა და განაცხადა, რომ გადაწყვეტილება ჯერ მიღებული არ ჰქონდა. დღეს, 9 ივლისს კი დადასტურდა, რომ შენგელიამ მოსკოვის ცსკა-სთან სამწლიანი კონტრაქტი გააფორმა.

"გელოდებით მოსკოვში", — წერია ქართულად და ინგლისურად ვიდეოზე, რომელშიც ამ ფაქტის აღსანიშნად კლუბმა გაავრცელა.

კალათბურთის ფედერაცია ეროვნული ნაკრების კაპიტნის, თორნიკე შენგელიას მოსკოვის კლუბში გადასვლას ულოცავს და მას წარმატებებს უსურვებს. ფედერაციაში აცხადებენ, რომ შენგელია ისევ "გაგვახარებს" წარმატებული კარიერით. მათივე თქმით, მიუხედავად იმისა, სად ითამაშებს შენგელია, ყოველთვის დაიცავს სამშობლოს ღირსებას.

გაიგეთ მეტი: