ნაციონალური მოძრაობის წევრის, რომან გოცირიძე ელექტრონული კომუნიკაციების კანონპროექტს გოცირიძე დრაკონულ კანონს უწოდებს

როგორც გოცირიძე ამბობს, ეს დანაშაულებრივი კანონპროექტია, რომელიც ტელევიზიების წინასაარჩევნოდ გაუქმებისკენაა მიმართული.

"წარმოუდგენელი რამ ხდება წინასაარჩევნოდ. ეს არის დრაკონული კანონი. სადამდე მიდის ამ ხელისუფლების თავხედობა, უკვე არ აქვს საზღვარი. ფაქტობრივად, ნებისმიერი ტელევიზიის ხელმძღვანელობა შეუძლია უკვე მარეგულირებელმა მოხსნას წვრილმანი მიზეზით ან ჯარიმის გადაუხდელობით ან ჯარიმას თუკი გადაიხდის, იმ შემთხვევაშიც თუ ჩათვლის რომ ეს არ არის საკმარისი", — განაცხადა TV პირველთან გოცირიძემ.

კომუნიკაციების მარეგულირებელ კომისიას შესაძლოა, ელექტრონული კომუნიკაციების სპეციალური მმართველის დანიშვნის უფლება მიეცეს. კომისიისთვის აღნიშნული ბერკეტის მიცემას ელექტრონული კომუნიკაციების შესახებ კანონში შესატანი ცვლილებები ითვალისწინებს, რომლის ინიციატორიც საქართველოს მთავრობაა.

კანონპროექტის თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას, კომისია უფლებამოსილია დანიშნოს სპეციალური მმართველი, რომელიც უზრუნველყოფს კომისიის გადაწყვეტილების აღსრულებას. ამავე კანონპროექტით, კომისიას მმართველის დანიშვნა 2-წლიანი ვადით შეუძლია და ის ანგარიშვალდებული მხოლოდ კომისიის წინაშეა.

კანონპროექტში აღნიშნულია, რომ სპეციალურ მმართველს არ უნდა ჰქონდეს ინტერესთა კონფლიქტი ავტორიზებული/ლიცენზიის მფლობელი პირის მიმართ.

კანონპროექტის მიხედვით, სპეციალურ მმართველს შეეძლება განახორციელოს ავტორიზებული/ლიცენზიის მფლობელი პირის სრული კონტროლი.