რუსთავის საქალაქო სასამართლოს მოსამართლემ 35 წლის დავით მუმლაძის მკვლელობის საქმეზე ერთ-ერთი ბრალდებული გიორგი ასათიანი უდანაშაულოდ სცნო და დარბაზიდან გაათავისუფლა.

საერთო სასამართლოების პრესსამსახურში On.ge-ს უთხრეს, რომ მკვლელობაში ბრალდებულ ზურაბ ჯღარკავას 20 წლით თავისუფლების აღკვეთა მიესაჯა, შსს-ს რუსთავის საქალაქო სამმართველოს თანამშრომლებს, დავით მიროტაძესა და მიხეილ ღუბიანურს 10-10 წლით პატიმრობა შეეფარდათ, ყოფილ სამართალდამცავს, დიმიტრი დუღაშვილსა და გიორგი გეთაშვილს კი 9-9 წელი.

ბრალდებულ გიორგი ასათიანის გათავისუფლებას მოკლული დავით მუმლაძის ოჯახის წევრების პროტესტი მოჰყვა.

მკვლელობა 2019 წლის ოქტომბერში მოხდა. ამ საქმეზე 6 პირი, მათ შორის პოლიციის თანამშრომლებია დაკავებული — ორი შსს-ს რუსთავის საქალაქო სამმართველოს თანამშრომელი, ხოლო ერთი ყოფილი სამართალდამცველი.

შსს-ს ინფორმაციით, ორმა მათგანმა, წარსულში დაპირისპირებისა და შურისძიების მოტივით, კაცის მკვლელობა დაგეგმა. გამოძიების ცნობით, ერთ-ერთმა ბრალდებულმა გარდაცვლილი კუთვნილ მანქანაში ჩაისვა და ვითომ შემთხვევით, მანქანით მოძრაობის დროს პოლიციის ფორმაში მყოფ სამ პირს შეხვდნენ. მათივე ინფორმაციით, მათ მოკლულს უკანონოდ აღუკვეთეს თავისუფლება, ჩაიყვანეს რუსთავში და გადასცეს ამ საქმეზე ბრალდებულ სხვა ორ პირს.

"აღნიშნულმა პირებმა ის ჩაიყვანეს მტკვრის ნაპირზე და ცივი იარაღით მიაყენეს მრავლობითი დაზიანება. კვალის დამალვის მიზნით, გარდაცვლილის ცხედარი მდინარე მტკვარში გადააგდეს. მისი ცხედარი 5 ოქტომბერს, რუსთავის მიმდებარე ტერიტორიაზე მტკვარმა გამორიყა", — აღნიშნავენ შსს-ში.