ელტონ ჯონის, ფრედი მერკურისა და ჯუდი გარლენდის შემდეგ დროა, რომ დიდ ეკრანზე სოულის დედოფლის — არეტა ფრანკლინის ბიოგრაფიული დრამა ვიხილოთ.

ახალ ფილმს არეტა ფრანკლინის ერთ-ერთი ყველაზე დიდი ჰიტის მსგავსად Respect (პატივისცემა) ჰქვია და ის მომღერლის ცხოვრებიდან რეალური ისტორიების შთაგონებით იმ სირთულეებით სავსე გზის შესახებ მოგვითხრობს, რომელიც გასულ საუკუნეში შავკანიანმა ქალმა მსოფლიო აღიარების მოსაპოვებლად გამოიარა.

კინოსურათში მთავარ როლს ოსკაროსანი მსახიობი ჯენიფერ ჰადსონი ასრულებს და ტრეილერიდანვე შეგვიძლია ვივარაუდოთ, რომ ის მაყურებლებისგან პატივისცემას კვლავ დაიმსახურებს.

Respect-ის სიუჟეტური ხაზი არეტა ფრანკლინის ცხოვრების ადრეული წლებიდან საკულტო შემსრულებლად ქცევამდე ყველაფერს მოგვითხრობს: ახალგაზრდა მომღერალი თავდაპირველად ეკლესიაში მღეროდა, 60-იან წლებში კი ისეთი მსოფლიო ჰიტები გამოუშვა, როგორებიცაა I Never Loved a Man, A Natural Woman და Think.

17 გრემის მფლობელი სოულის ლეგენდის როლს მომღერალი და მსახიობი ჯენიფერ ჰადსონი ასრულებს, რომელმაც მიუზიკლ Dreamgirls-ში შესრულებული როლით 2007 წელს ოსკარის ჯილდოც დაიმსახურა.

ამ ბიოგრაფიული კინოსურათის გადაღებებზე წლების განმავლობაში მუშაობდნენ და აღსანიშნავია, რომ მის შექმნაში ჩართული იყო თავად არეტა ფრანკლინიც, თუმცა, სამწუხაროდ, ის 2018 წელს 76 წლის ასაკში გარდაიცვალა და თავად დასრულებული სურათის ხილვას ვეღარ შეძლებს.

ფილმის პრემიერა აგვისტოში უნდა შემდგარიყო, თუმცა ამ თარიღმა პანდემიის გამო დეკემბრამდე გადაიწია.