19 წლის ფეხბურთელის, გიორგი შაქარაშვილის საქმეზე დაკავებული პირების ადვოკატები აცხადებენ, რომ აღკვეთის ღონისძიებას გაასაჩივრებენ. 17-ვე დაკავებულს სასამართლომ დღეს წინასწარი პატირმობა შეუფარდა.

ერთ-ერთი ადვოკატის, ალექსანდრე კობაიძის განცხადებით, სარჩელს სტრასბურგის სასამართლოში შეიტანს, რადგან საქართველოს სასამართლოებს პროკურატურა მართავს.

"მოსამართლეს ხმა უკანკალებდა და ისე იღებდა გადაწყვეტილებას. ეს მიანიშნებს იმას, რომ მასზე შესაძლებელია განხორციელდა ფსიქოლოგიური ან სხვაგვარი ზემოქმედება. რა თქმა უნდა, ჩვენ ყოველგვარ ბერკეტს გამოვიყენებთ. მათ შორის, ვაპირებთ რომ აღკვეთის ღონისძიება გავასაჩივროთ სტრასბურგის სასამართლოში. დარწმუნებული ვართ, რომ სტრასბრუგის სასამართლო სხვაგვარად იმსჯელებს. [...]

პროკურატურის გავლენის ქვეშ არის ჩვენი სასამართლო და სამარცხვინოა, რომ ასეთ მოსამართლეებს ვხედავ", — განაცხადა დაცვის მხარის ერთ-ერთმა ადვოკატმა, ალექსანდრე კობაიძემ.

ადვოკატი გიორგი გელხაური აცხადებს, რომ პროკურატურის მოთხოვნა აღვეთის ღონისძიებაზე პატირმობის გამოყენების შესახებ თავიდანვე უკანონო იყო და სასამართლომ "ეს უკანონო გადაწყვეტილება გააგრძელა. მისი თქმით, არანაირი მოლოდინი არ აქვთ, რომ გასაჩივრება რამეს შეცვლის, მაგრამ მაინც გაასაჩივრებენ.

ადვოკატი არჩილ ბერიანიძე კი აცხადებს, რომ მისი დაცვის ქვეშ მყოფი პირები გამოძიებასთან თანამშრომლობდნენ და საქმეში არ არსებობს ფორმალური და ფაქტობრივი გარემოებები, რომლის გამოც აღკვეთის ღონისძებად პატიმრობა უნდა შეფარდებოდათ.

პასუხად პროკურატურა აცხადებს, რომ არსებობს მიმალვისა და ახალი დანაშაულის, კერძოდ მტკიცებულებების გადანგურების საფრთხე.

დაკავებულებს ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვს წარდგენილი.

საქმეზე გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" და "გ" ქვეპუნქტებით, 225-ე მუხლის პირველი და მე-2 ნაწილებით და 143-ე მუხლის მე-3 ნაწილის "ა" ქვეპუნქტით მიმდინარეობს.

პროკურატურის ინფორმაციით, საქმის ირგვლივ გამოიკითხა 60-მდე პირი და მოწმეთა დაკითხვა ამ ეტაპზეც გრძელდება, მოპოვებულია მომხდარი ფაქტების ამსახველი ვიდეომასალაც.

უწყება აცხადებს, რომ სასამართლო-სამედიცინო ექსპერტიზის დასკვნის მიღების და გიორგი შაქარაშვილის გარდაცვალების მიზეზის დადგენის შემდეგ საქმეს შესაბამისი შესაბამისი სამართლებრივი შეფასება მიეცემა.

19 წლის გიორგი შაქარაშვილის ცხედარი 4-დღიანი ძებნის შემდეგ 22 ივნისს, მდინარე არაგვში გარდაცვლილი იპოვეს.

ამავე თემაზე: