პრემიერმინისტრმა, გიორგი გახარიამ დეპუტატ ნატო ჩხეიძის კითხვას არ უპასუხა, რადგან თქვა, რომ ვერ გაიგო. ნატო ჩხეიძემ კითხვის დასმისას პრემიერს უთხრა, რომ ბოლო თვეში პარლამენტში 2 ვიზიტისას გახარიამ მის კითხვებს კატეგორიულად არ უპასუხა.

"ვერ მივხვდი თქვენს ეპისტოლარულ ჟანრს, ამიტომ ძალიან გთხოვთ ეს კითხვები წერილობით მომაწოდეთ და წერილობით გიპასუხებთ", — თქვა გიორგი გახარიამ.

დეპუტატმა პრემიერს გაახსენა წინა ვიზიტების დროს დასმული კითხვები — თუ რა ბედი ელოდათ სამშობლოში დაბრუნებულ ემიგრანტებს და რა გაკეთდა ექიმებისთვის "წამახალისებელი ელემენტების" ფარგლებში. დამატებით კი 2 ახალი კითხვა დასვა:

"თქვენ თქვით, რომ ივანიშვილის დონაციას გამოიყენებდით მეტი გაჭირვების პირობებში, რა არის ეს მეტი გაჭირვება და კონკრეტულად რა პროექტში აპირებთ ამ თანხის გამოყენებას. მეორე, მე არ ვიცი ბატონ სესიაშვილს რატომ დასჭირდა თქვენი წახმარება 20 ივნისთან დაკავშირებით, ალბათ იმიტომ, რომ თქვენ ლოკალური ამნეზია გაქვთ ამ საკითხთან [...] რა არგუმენტები გააჩნიათ [საპარლამენტო] შტურმის დასასაბუთებლად, გარდა ზეპირსიტყვიერი რიტორიკისა", — თქვა ნატო ჩხეიძემ.

დღეს, 26 ივნისს პრემიერი, გიორგი გახარია პარლამენტში წლიური ანგარიშით წარსდგა.