დამოუკიდებელმა დეპუტატმა, ეკა ბესელიამ პარლამენტის ტრიბუნიდან განაცხადა, რომ შესაძლოა, მოქმედი მთავრობის წევრები პირადი ცხოვრების კადრების გავრცელებასთან იყვნენ კავშირში. მან ყოფილ თანაგუნდელ პრემიერმინისტრს ჰკითხა, რა მიზანი ჰქონდა კადრების გავრცელებას და იყო თუ არა ეს ქართული ოცნების სასჯელი მოსამართლეთა სიაზე პროტესტის გამო.

"ეს არის თემა, რომელმაც მე პირადად ბევრი გადაწყვეტილება შემიცვალა და ბევრი რამ შემიცვალა. აქ არიან მათ შორის მთავრობის ის წევრები, რომლებიც შესაძლოა, დაკავშირებული იყვნენ ამ საკითხთან. [...]

რა იყო ეს? ეს იყო დასჯა, ეს იყო სამაგიეროს გადახდა, ეს იყო ანგარიშსწორება, თუ ეს იყო გაფრთხილება ყველა დანარჩენის მიმართ, ვინც გაბედავდა და ამ თემაზე ან სხვა თემაზე აირჩევდა ფორმას პროტესტისას, რაც მე ავირჩიე?", — განაცხადა მან.

ბესელიამ აღნიშნა, რომ კადრების გავრცელების შემდეგ წელიწადნახევარი გავიდა და მას ამ დრომდე არ აქვს პასუხი, ვინ და რატომ ჩაიდინა ეს დანაშაული.

"თქვენ იყავით შინაგან საქმეთა მინისტრი, როდესაც უმრავლესობის დეპუტატის, პარლამენტის წევრის მიმართ გავრცელდა სააკშვილის ხელისუფლების დროს ჩაწერილი უკანონო ჩანაწერები.

დღეს არის ივნისის ბოლო და გავიდა წელიწადი და 5 თვე. თქვენ თქვით, რომ იტყოდით, ვინ ჩაიდინა ეს დანაშაული. არ მითხრათ ეხლა, რომ ეს საქმე გახსნილია, იმიტომ რომ ეს საქმე გახსნილი არ არის და ამ კითხვაზე მე ჯერჯერობით პასუხი არ მიმიღია.

გეკითხებით ახლა, ვინ დაგეგმა ის დანაშაული, რა მიზანი ჰქონდა იმ დანაშაულის დაგეგმვას და რატომ დაემთხვა ეს იმ პერიოდს, როცა ჩვენ გვქონდა უმწვავესი კონფლიქტი მოსამართლეთა ათკაციან სიაზე", — განაცხადა მან.

ბესელიამ ასევე აღნიშნა, რომ ამ კითხვაზე პასუხს აუცილებლად მიიღებს და არ დაიღლება, რა დროც არ უნდა დასჭირდეს ამას.