რესპუბლიკური პარტიის ერთ-ერთ ლიდერს, ხათუნა სამნიძეს მოწმის სტატუსით დღეს საქართველოს უსაფრთხოების სამსახურში გამოკითხვაზე დაიბარებენ. ამის შესახებ ინფორმაცია On.ge-ს უწყებაში დაუდასტურეს. საქმე ეხება საბოტაჟის მუხლით მიმდინარე გამოძიებას, რომლის ფარგლებშიც მანამდე სუს-ში გამოკითხვაზე მთავარი არხის რესპონდენტები დაიბარეს.

როგორც სუს-ში განგვიცხადეს, სამნიძეს გამოკითხვაზე დაბარების ოფიციალური უწყება დღის განმვალობაში მიუვა. ჯერჯერობით უცნობია, ზუსტად რა დროს დაიბარებენ პოლიტიკოსს. უწყებაში ასევე არ ადასტურებენ, სამნიძის გამოკითხვაზე დაბარების მიზეზი მისი ფეისბუქპოსტი გახდა თუ არა.

თავად სამნიძემ კი ამბობს, რომ მას სუს-იდან გუშინ დაუკავშირდნენ და უთხრეს, რომ სჭირდებოდათ დასტური, ნამდვილად დაწერა თუ არა მან პოსტი Covid-19-ის სტატისტიკის გაყალბებასთან დაკავშირებით. მისი თქმით, მას ამასთან დაკავშირებით არანაირი პოსტი არ დაუწერია და ამ თემაზე მხოლოდ კომენტარები აქვს დაწერილი. თუმცა, პირი, რომელიც მას დაუკავშირდა, მისგან აღნიშნულ საკითხზე პოსტის დაწერის დადასტურებას ითხოვდა.

როგორც სამნიძე ამბობს, ეს "ადამიანების პირდაპირი დაშინება" და ამა გამოძიებასთან საერთო არაფერი აქვს.

მისივე თქმით, ოფიციალური უწყების მიღების შემდეგ, იურისტებთან კონსულტაციას გაივლის და გადაწყვეტს მივიდეს თუ არა სახელმწიფო უსაფრთხოების სამსახურში.

სახელმწიფო უსაფრთხოების სამსახურში გამოკითხვაზე დაიბარეს მთავარი არხის სიუჟეტის რესპონდენტები, რომლებიც კოვიდსტატისტიკის გაყალბებაზე საუბრობდნენ. უწყების განმარტებით, ისინი საბოტაჟის მუხლით დაწყებული გამოძების ფარგლებში გამოიკითხებიან, რომელიც რამდენიმე თვის წინ კორონავირუსზე ცრუ შეტყობინებების დაგზავნის შემდეგ დაიწყო.

სიუჟეტი მთავარი არხის ეთერში 20 ივნისს გავიდა. რესპონდენტები მარნეულიდან ტელევიზიასთან საუბრისას აცხადებდნენ, რომ კონკრეტულ პირებს 10 000 ლარი შესთავაზეს იმის სანაცვლოდ, რომ ოჯახის წევრის გარდაცვალების მიზეზად კორონავირუსი დაესახელებინათ.

მომხდარზე გამოძიება საქართველოს სისხლის სამართლის კოდექსის 318-ე მუხლის 1-ლი ნაწილით მიმდინარეობს.

სახელმწიფო უსაფრთხოების სამსახურის მტკიცებით, საბოტაჟის საქმეზე გამოკითხული მთავარი არხის რესპონდენტები ამბობენ, რომ ტელეკომპანიამ მათი კომენტარები დაამონტაჟა. უწყებაში აცხადებენ, რომ მთავარმა არხმა აზერბაიჯანულენოვანი ინტერვიუები არასწორად თარგმნა და გაავრცელა ინფორმაცია, რომ ადგილობრივი ხელისუფლების წარმომადგენლები, გარდაცვალების მიზეზად კორონავირუსის დასახელების სანაცვლოდ, მოქალაქეებს 3 000-დან 10 000 ლარამდე სთავაზობენ.

პასუხად მთავარ არხში აზერბაიჯანულენოვანი ვერსია, ტიტრებით გაუშვეს.