ადამიანის უფლებათა დაცვის კომიტეტის თავმჯდომარე, სოფო კილაძე პრობლემას ვერ ხედავს იმაში, რომ ფეისბუქპოსტებისა და მედიებისთვის მიცემული ინტერვიუების გამო ხალხს სუს-ში იბარებენ.

მისი თქმით, ის უფრო გაუკვირდებოდა სუს-ს ეს ხალხი რომ არ გამოეკითხა. ასე უპასუხა მან ჟურნალისტების კითხვას კოვიდსტატისტიკის გაყალბების მცდელობაზე მომზადებული სიუჟეტის შესახებ.

"როდესაც ასეთი ინფორმაცია ვრცელდება, ამას ბუნებრივია, უნდა მიექცეს ყურადღება, რადგან აქ იკვეთება გარკვეული დანაშაულის ნიშნები. მე გამიკვირდებოდა, სახელმწიფო უსაფრთხოების სამსახურს, რომელიც არის პასუხისმგებელი ქვეყნის უსაფრთხოებაზე, არ მიექცია ამისთვის ყურადღება", — განაცხადა მან.

მისივე განმარტებით, ეს ემსახურება ინფორმაციის მიღების მიზანს და არა ვინმეს დისკრედიტაციას.