საერთაშორისო გამჭვირვალობა — საქართველოს (TI) მოკვლევის მიხედვით, აჭარის მაღალმთიან მუნიციპალიტეტების (ხულო, შუახევი, ქედა) მაჟორიტარი დეპუტატის, ანზორ ბოლქვაძის ნათესავების კომპანიებმა 2016-2020 წლებში სახელმწიფო შესყიდვებით ჯამში 6 მილიონამდე ლარის შემოსავალი მიიღეს.

ორგანიზაცია აცხადებს, რომ კომპანიებსა და ნათესავებს შორის შემოსავალი შემდეგნაირად ნაწილდება:

• ბიძაშვილის, რომან ბოლქვაძის შპს გიგა 2015 — 3 825 175 ლარი;
• რძლის, გურანდა გობაძის შპს აისმა — 1 148 599 ლარი;
• მამიდაშვილის შვილის, არჩილ ქედელიძის შპს ქედემ — 844 768 ლარი;
• სამივე კომპანიამ, ჯამში უკონკურენტო პირობებში სახელმწიფო შესყიდვებიდან 2 317 773 ლარი.

TI ვარაუდობს, რომ ბოლქვაძემ მოქმედ და წინა ხელისუფლებასთან ახლო კავშირით და გავლენებით უზრუნველყო საკუთარი ოჯახის, ნათესავებისა და სხვა დაახლოებული პირების შემოსავლების მკვეთრი ზრდა სახელმწიფო შესყიდვების ხარჯზე. კვლევაში აღნიშნულია, რომ:

• მისმა ოჯახმა ამ წლების განმავლობაში დაირეგისტრირა სასტუმროები ბეშუმსა და გოდერძის სამთო კურორტზე, რომელთაც ათეულ ათასობით კვადრატული მეტრი მიწის ნაკვეთები ეკუთვნით;
• 2008 წელს მაჟორიტარად არჩევიდან მალევე, მისი შვილი როლანდ ბოლქვაძე აჭარის საგზაო დეპარტამენტში დასაქმდა. ამჟამად იგი ლოჯისტიკის სამსახურის უფროსი და სატენდერო კომისიის წევრია;
• დეპუტატის ნათესავების კომპანიებმა: აისმა, ქედემ და გიგა 2015-მა ბოლო 5 წელიწადში ამავე დეპარტამენტიდან და აჭარაში მოქმედი სხვა შემსყიდველი ორგანიზაციებიდან სახელმწიფო ტენდერებისა და გამარტივებული შესყიდვების გზით 6 მილიონ ლარამდე მიიღეს. ამ კომპანიებისთვის უკონკურენტო გარემოს ხელოვნურად შექმნა, ვფიქრობთ, უნდა გახდეს საგამოძიებო ორგანოების მოკვლევის საფუძველი.

საერთაშორისო გამჭვირვალობა - საქართველოს აზრით, ხულოს, შუახევისა და ქედის მაჟორიტარი დეპუტატის, მისი ოჯახის წევრების და ახლო წრის წარმომადგენელთა ბიზნესსაქმიანობა არაერთ კითხვას აჩენს კორუფციის რისკებთან, ნეპოტიზმთან და დეპუტატის მანდატის არაკეთილსინდისიერ გამოყენებასთან დაკავშირებით.

"დეპუტატის ეკონომიკური საქმიანობა განსაკუთრებით თვალშისაცემია იმის ფონზე, რომ ანზორ ბოლქვაძე არ გამოირჩევა აქტიური კანონშემოქმედებითი საქმიანობით (დეპუტატობის 12 წლის მანძილზე ბოლქვაძემ პარლამენტში განსახილველად სულ 5 ინიციატივა წარადგინა. 5-დან მხოლოდ 2 შემთხვევაში იყო ინიციატივის ავტორი - ერთი დამოუკიდებლად, მეორე კი სხვა დეპუტატებთან ერთად მოამზადა, დანარჩენი 3 წარდგენილი დოკუმენტი აჭარის მთავრობაში, აჭარის მთავრობის გარემოს დაცვის სამმართველოსა და ბათუმის მერიაში მომზადდა)", — აღნიშნულია განცხადებაში.

ორგანიზაცია მოუწოდებს:

• სახელმწიფო უსაფრთხოების სამსახურის ანტიკორუფციულ დეპარტამენტს, დაუყოვნებლივ დაიწყონ მოკვლევა იმ სახელმწიფო ტენდერებთან დაკავშირებით, რომლებიც კომპანია აისის, ქედესა და გიგა 2015-ის უკონკურენტო პირობებში გამარჯვებით დასრულდა;
• საჯარო სამსახურის ბიუროს, ზემოაღნიშნული ფაქტების გათვალისწინებით, საგანგებოდ შეამოწმოს დეპუტატ ანზორ ბოლქვაძის ბოლო ქონებრივ დეკლარაციაში მითითებული მონაცემები და არასრული ინფორმაციის აღმოჩენის შემთხვევაში, იმოქმედოს კანონით დადგენილი ნორმებით;