ჩეჩნეთის ლიდერი, რამზან კადიროვი ქართველ ტელეწამყვან გიორგი გაბუნიას ისევ ემუქრება და აცხადებს, რომ "სჯობს მან მუხლებზე დაიჩოქოს და მომხდარისთვის ბოდიში მოიხადოს". კადიროვი განცხადებას ტელეგრამის მეშვეობით ავრცელებს.

"მივმართავ ქართულ ხელისუფლებას, მიიღოს ზომები ამ მოქალაქის ხელახალი აღზრდისთვის. რეკომენდაციას ვაძლევთ, სწორი დასკვნები გამოიტამოს და თავისი გონება მწყობრში მოიყვანოს. წინააღმდეგ შემთხვევაში, ვიმეორებ, ჩემს მტრად დარჩება. რაც შეეხება უკრაინულ მხარეს, რომელიც ამტკიცენს, რომ შეკვეთილი თავდასხმის შესახებ ინფორმაცია გადასცა, მინდა ვუყრჩიო, სამომავლოდ უფრო სერიოზულად მოიქცნენ და არა ხალხის გასაცინებლად. მსგავსი წერილები მტკიცებულებებით მაინც გააგზავნეთ. ისედაც ბოლო წლებია პიარს ჩემი სახელის დამსახურებით იკეთებთ. არანაირად არ გამოგდით თქვენს ხალხთან მუშაობა და პერიოდულად ჩემი სახელის ხსენებით მათ თავს ახსენებთ ამ პიარისთვის, სხვათა შორის, მე უნდა მიმადლოდეთ. დაიმახსოვრეთ ეს! დრო მოვა, ანგარიშს წარმოგიდგენთ! აუცილებლად!" — წერს კადიროვი.

იგი, ასევე ამბობს, რომ თუ ვინმე მისი დავალებით მოქმედებს, "ის მას შეასრულებს" და თუ დავალება ჩუმადაა შესაარულებელი, მაშინ ვერავინ გაიგებს:

"ის თქვენი ფუჭად მოლაპარალე, რომელიც, როგორც მედიის წარმომადგენელი, ისე პიზიციონირებს, ისედაც ძლივსაა ცოცხალი, განდიდების მანიითაა შეპყრობილი. ყველა სერიოზული მედია მას კინწისკვრით აგდებს. მაგრამ მე ხაზს ვუსვამ, რომ ჩვემ არ დაგვიწყვებია, როგორ შეურაცხყო მან ჩენი სახელმწიფო, ჩვენი ხალხი, ანუ პირადად მეც".

ჩეჩნეთის ლიდერი რამზან კადიროვი რუსთავი 2-ის ეთერში გიორგი გაბუნიას მიერ ვლადიმერ პუტინის მისამართით გინებას 2019 წლის 9 ივლისს გამოეხმაურა. მან ჟურნალისტს "არარაობა" და "ნაძირალა" უწოდა. კადიროვმა მაშინ მოითხოვა, რომ საქართველოს თანამდებობის პირებმა ოფიციალურად, საჯაროდ უნდა მოუხადონ ბოდიში პუტინს, ხოლო გაბუნიას წინააღმდეგ სისხლისამართლებრივი დევნა დაიწყოს.

გიორგი გაბუნიას ლიკვიდაციის საქმე

15 ივნისს, ჯერ ტელეკომპანია ფორმულამ, შემდეგ კი მთავარი არხის გენერალურმა დირექტორმა, ნიკა გვარამიამ გაავრცელეს ინფორმაცია, რომ გიორგი გაბუნიას ლიკვიდაციას ჩეჩნეთის ლიდერი, რამზან კადიროვი გეგმავდა. გვარამიას თქმით, გაბუნიას რამდენიმე თვის განმავლობაში უთვალთვალებდნენ, საქმის გამოძიება კი თავდაპირველად უკრაინაში დაიწყო. გვარამია აღნიშნავს, რომ მას შემდეგ, რაც უკრაინელმა სამართალდამცავებმა საქმე საქართველოს გადმოსცეს, ქართულმა მხარემ ეს "დიდი ლობის" პროვოკაციად ჩათვალა.

"ჩვენი ინფორმაციით, იყო რამდენიმე ჯგუფი, რომელიც აკონტროლებდა მარშრუტს პირველ საფეხურზე. მოძრაობის დადგენის შემდეგ, მეორე საფეხურზე იყო შემოსული ქილერი, რომელსაც უნდა განეხორციელებინა, ასე ვთქვათ... ის, რასაც ქილერები ახორციელებენ ზოგადად და ის, რაც იყო დაგეგმილი", — თქვა გვარამიამ.

სახელმწიფო უსაფრთხოების სამსახურის ინფორმაციით, რუსეთის მოქალაქე შეკვეთით განზრახ მკვლელობის მომზადების ფაქტზე დაწყებული სისხლის სამართლის საქმის გამოძიების ფარგლებში დააკავეს. თუმცა, უწყებაში არ აკონკრეტებენ საქმე ეხება თუ არა მთავარი არხის წამყვანის, გიორგი გაბუნიას დაგეგმილ ლიკვიდაციას.

გაბუნიას გინება პირდაპირ ეთერში — რა მოხდა

2019 წლის ივლისში, გიორგი გაბუნიამ, რომელიც მაშინ რუსთავი 2-ზე მუშაობდა, პირდაპირ ეთერში წამყვანმა რუსეთის პრეზიდენტ ვლადიმერ პუტინს აგინა. მან არაეთიკურად და შეურაცხმყოფლად მოიხსენია პუტინის გარდაცვლილი მშობლებიც. მაშინდელმა გენერალურმა დირექტორმა, ნიკა გვარამიამ თქვა, რომ არხი კატეგორიულად არ იზიარებს გამოხატვის მსგავს ფორმას, მიუხედავად იმისა, რომ, შესაძლოა, პოზიციას ეთანხმებოდნენ. ამ ყველაფერს ტელევიზიასთან საპროტესტო აქციები მოჰყვა. ორგანიზატორები ითხოვდნენ, რომ გენერალურ დირექტორს, ნიკა გვარამიასა და ჟურნალისტს გიორგი გაბუნიას არხი დაეტოვებინა.

საქართველოს მთავრობის წარმომადგენლებმა გიორგი გაბუნიას განცხადება ქვეყნის წინააღმდეგ ომად შეაფასეს. კახა კალაძემ თქვა, რომ ამას მკაცრი რეაგირება უნდა მოჰყვეს და ქვეყნისთვის საფრთხის შექმნას არ დაუშვებენ. მსგავსი შინაარსის განცხადებები ჰქონდათ პრემიერ-მინისტრსა და პარლამენტის თავმჯდომარესაც. პრეზიდენტიც იმავე აზრზეა და ფიქრობს, რომ ეს ქცევა ან "ახალი ომის პროვოცირებას ემსახურება", ან "რევანშია დაუსრულებელ გადატრიალებაზე". რამდენიმე საათში საქართველოს საგარეო საქმეთა სამინისტრომ საერთაშორისო ორგანიზაციებს "ამ ქცევის" შეფასება სთხოვა.

პატრიოტთა ალიანსის წევრმა, ადა მარშანიამ გაბუნიას დაპატიმრება მოითხოვა და ამისთვის მთავარ პროკურორს, შალვა თადუმაძეს მიმართა.

გინებას გამოხმაურება მოჰყვა რუსულ მედიაშიც. ოკუპანტ ქვეყანაში წამყვანის ქცევა პროვოკაციად შეაფასეს. დუმის დეპუტატები ჟურნალისტის სამართლებრივ დასჯას და მის რუსეთში ექსტრადირებას ითხოვდნენ. განცხადება გააკეთა პუტინმაც და თქვა, რომ "ასეთი ადამიანების წინააღმდეგ საქმის აღძვრა დიდი პატივია".

"ვიღაც გამოვიდა, რაღაც წამოროშა, საკუთარი თავის რაღაცად წარმოსაჩენად. მის შესახებ არავინ არაფერი იცოდა, ახლა ყველა მასზე ლაპარაკობს", — თქვა პუტინმა გაბუნიაზე.

ბოდიშის მოხდა და დევნის დაწყება კი ჩეჩნეთის ლიდერმა, რამზან კადიროვმა მოითხოვა. მან გაბუნიას გადამალვა ურჩია, "რადგან მსოფლიოში არის მილიონობით ახალგაზრდა, რომელთაც უყვართ პუტინი" და "პირველივე შემხვედრი გაუკეთებს მას იმას, რაც დაიმსახურა".