პრემიერი გიორგი გახარია აცხადებს, რომ 2020 წლის საპარლამენტო არჩევნების პანდემიის გამო გადავადების რისკი არ არსებობს, ან თუკი ასეა, ეს [რისკი] "მინიმალურია". ამის შესახებ მან დღეს. 16 ივნისს პირველ არხთან ინტერვიუში განაცხადა:

"იქიდან გამომდინარე დარომ ამ კრიზისს ახასიათებს მაღალი დონის გაურკვევლობა, შეიძლება ვთქვათ, რომ... მე საერთოდ, მივიჩნევ, რომ ასეთი რისკი არ არსებობს, თუ არსებობს, მინიმალურია. დღეს არჩევნებს საკონსტიტუციო ვადებში არაფერი ემუქრება. მიუხედავად იმისა, რომ ვხვდები, ერთ შემთხვევასაც და მეორესაც ხალხი პოლიტიკური სპეკულაციებისთვის იყენებს".

ქართული ოცნების აღმასრულებელმა მდივანმა, ირაკლი კობახიძემ თქვა, რომ თუ COVID-19-ის მე-2 ტალღა ოქტომბრამდე იქნება, არჩევნები დეკემბრისთვის გადაიწევს. კობახიძე ვარაუდობს, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდეა], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს. კანონით კი, არჩევნები საგანგებო მდგომარეობის გაუქმებიდან არაუადრეს 45 დღისა და არაუგვიანეს 60 დღისა უნდა ჩატარდეს.