ნაციონალური მოძრაობის წევრმა, დავით ბაქრაძემ დღეს, 30 ნოემბერს პოლიტსაბჭოს სხდომის შედეგი ჟურნალისტებთან საუბრისას შეაფასა, რომლის მიხედვით ყრილობა მასშტაბური იქნება და თავმჯდომარის პოსტი ისევ ვაკანტური დარჩება. როგორც ბაქრაძემ თქვა, მიუხედავად შიდა კამათისა, გადაწყვეტილებას ყველა წევრი პატივს სცემს და მას აუცილებლად შეასრულებენ:

"მინდა ხაზგასმით აღვნიშნო, რომ მიუხედავად შიდა კამათის და აზრთა სხვადასხვაობიდა, გადაწყვეტილებას, რომელიც მიიღო პოლიტსაბჭომ, მისი ყველა წევრი პატივს სცემს. ეს იქნება ის გადაწყვეტილება, რომელსაც შეასრულებს ყველა წევრი და მთლიანად პარტია".

ბაქრაძის თქმით, პარტიის ყრილობა გაიმართება სავარაუდოდ 20 იანვარს. მისივე განმარტებით, ეს იქნება მრავალრიცხოვანი ყრილობა, დაახლოებით 7 ათასი დელეგატის შემადგენლობით:

"ძალიან საქმიანი, ჯანსაღი და გულახდილი დისკუსია იყო პოლიტსაბჭოს სახდომაზე. ეს არის ის რითიც ნაციონალური მოძრაობა ყოველთვის გამოირჩეოდა - ნორმალური, ჯანსაღი შიდა დისკუსიის უნარით და იმ უნარით, რომ შიდა დისკუსიის შემდეგ პარტია დარჩეს ერთიანი და გამოვიდეს გაძლიერებული ნებისმიერი კამათიდან. ვფიქრობ, რომ დღევანდელი დისკუსიაც ასე წარიმართა, საქმიანად, მშვიდად, კოსნტრუქციულად".

პოლიტსაბჭოს გადაწყვეტილებას არ ეთანხმება პარტიის ერთ-ერთი ლიდერი ელენე ხოშტარია. ამის შესახებ, მან ფეისბუქის საკუთარ გვერდზე გაავრცელა განცხადება და თქვა, რომ პარტიის თავმჯდომარეები უნდა იცვლებოდნენ და გადაწყვეტილებები დემოკრატიულად მიიღებოდეს:

"პოლიტსაბჭომ მიიღო გადაწყვეტილება ყრილობის წესის შესახებ, რომელსაც მე არ ვემხრობოდი, თუმცა ცხადია ვემორჩილები. ასეთია დემოკრატიული პროცესი. სამწუხაროა, რომ ზოგიერთი თანაგუნდელი ლანძღვაზე, შანტაჟზე და შეურაცხყოფაზე გადმოვიდა მხოლოდ იმის გამო, რომ მათგან განსხვავებული პოზიცია მქონდა. ცხადია ამას არ გავიმეორებ. არც პიროვნულად მიმაჩნია სწორი და არც პარტიის ინტერესებიდან გამომდინარე. რაც შეეხება თავმჯდომარის არჩევას, რაც ყრილობაზე გადაწყდება, ეს ჩემთვის ძალიან მნიშვნელოვანი საკითხია".

მასშტაბური ყრილობის მოწინააღმდეგეა ასევე გიგა ბოკერიაც. მისი თქმით, როცა მიხეილ სააკაშვილი ქვეყანიდან წასულია, ენმ-ს თავმჯდომარე სჭირდება და დავით ბაქრაძე ამისათვის საუკეთესო კანდიდატურაა.

დღეს, 30 ნოემბერს, ნაციონალურ მოძრაობაში პოლიტსაბჭოს სხდომის შედაგად გადაწყდა, რომ გაიმართება ფართომასშტაბიანი ყრილობა, რომელზეც თავმჯდომარეს არ აირჩევენ და პოსტი ისევ ვაკანტური რჩება.

ყრილობაზე ხმები 24/25-ზე გადანაწილდა. არჩეული წესი გულისხმობს ყრილობის ბევრად უფრო წარმომადგენლობით მოდელს, 7000-მდე დელეგატის მონაწილეობით და არ გულისხმობს ახალი თავმჯდომარის არჩევას. აღნიშნულ ვერსიას ყოფილი პრეზიდენტი მიხეილ სააკაშვილი ემხრობა.