ევროპული საქართველოს წევრი, გიგა ბოკერია ამბობს, რომ ძალა ერთობაშია და ნაციონალური მოძრაობა ერთი პოლიტიკური სუბიექტია, შესაბამისად, თბილისის მაჟორიტარული ორი ოლქი მათ უკვე დაიკავეს. ბოკერიას თქმით, დანარჩენ პარტიებთან მოლაპარაკებები გრძელდება.

ნაციონალური მოძრაობის თავმჯდომარე, გრიგოლ ვაშაძემ მთავარი არხის ეთერში განაცხადა, რომ თბილისის ორ ოლქში — სამგორსა და გლდანში — მაჟორიტარ კანდიდატებს მხოლოდ მისი პარტია წარადგენს, ხოლო ძალა ერთობაშიას გაერთიანებაში შემავალ პარტიებს დარჩენილ ექვს ოლქში შეეძლებათ კანდიდატების წარდგენა.

გიგა ბოკერიას აზრით, ძალა ერთობაშიაში შემავალ სუბიექტებთან მოლაპარაკებების წარმართვა არასწორია, რადგან ისინი ნაციონალურ მოძრაობასთან არიან კოალიციაში.

"გრიგოლ ვაშაძეს ეს ახასიათებს ხოლმე, წინა ხელისუფლების პრობლემებზე როცა ესაუბრებიან, რომელიც იყო, ამბობს მე რა შუაში ვარო, მაგრამ მიღწევებზე საუბარი უყვარს ხოლმე. აქაც ეგრეა. როცა უნდა ძალა ერთობაშია დიდი ძალაა და ახლა უცებ გაირკვა, რომ ყველა ცალკეულ სუბიექტთან უნდა იყოს მოლაპარაკება? ეს ხომ არასერიოზულია", — აღნიშნა ბოკერიამ.

პარტია ახალი საქართველოს ლიდერი, გიორგი ვაშაძე, რომელიც გაერთიანება ძალა ერთობაშიას წევრია, აცხადებს, რომ თბილისის ოლქებში ერთ კანდიდატს მაინც წარადგენენ.

მოძრაობაში ძალა ერთობაშია 11 პოლიტიკური სუბიქეტი შედის: ახალი საქართველოსთვის,
ემსახურე საქართველოს, ეროვნულ-დემოკრატიული პარტია, სახელმწიფო ხალხისთვის,
ქრისტიან-კონსერვატიული პარტია, ერთიანი ნაციონალური მოძრაობა, სამოქალაქო ალიანსი თავისუფლებისათვის, ახალი საქართველო, საქართველო ლიდერთა შორის, საქართველოს ევროპელი დემოკრატები, კანონი და სამართალი.