ქართული ოცნების წევრი და ჯანდაცვის კომიტეტის თავმჯდომარე აკაკი ზოიძე პარლამენტის შენობაში მოწევის აკრძალვის ინიციატივით გამოდის. დღეს, 30 ნოემბრის პლენარულ სხდომაზე აკაკი ზოიძემ თამბაქოს მავნე ზეგავლენაზე ისაუბრა და განაცხადა, რომ პარლამენტმა მაგალითი უნდა მისცეს სხვა სტრუქტურებსაც:

"დღეს საქართველოში ყოველი მეორე ბავშვი ან ეწევა ან არის მეორადი მოწევის მსხვერპლი. ეს არის რეალურად თამბაქოს ეპიდემია და პარლამენტის წევრებმა უნდა მივცეთ მაგალითი ჩვენს მოქალაქეებს სანამ კანონს მივიღებთ, საქართველოს პარლამენტში, როგორც ქუთაისში, ისე თბილისში ავკრძალოთ მოწევა და ასევე მოვუწოდებთ სხვა საჯარო სამსახურებს. მე როდესაც პარლამენტარის უფლებამოსილების ფიცი დავდეთ, იმ დღეს დავანებე თავი მოწევას".

ნაციონალური მოძრაობის წევრი სერგი კაპანაძე იზიარებს აკაკი ზოიძის აზრს, თუმცა განმარტავს რომ დეტალები და ფორმა მნიშვნელოვანია და მხოლოდ აკრძალვა საკმარისი არ იქნება:

"თავშეყრის ადგილებში აკრძალვა შესაძლებელია, რადგან ეს მართლაც არის პრობლემა, თუმცა ამისი დეტალები ძალიან მნიშვნელოვანია. არ მგონია რომ ის რაც გუშინ გააკეთა მთავრობა, რომ გააძვირა აქციზი, ეს გადაჭრის პრობლემას. ის ადამიანი რომელიც ვეღარ ყიდულობს ძვირიან სიგარეტს იყიდის უფრო იაფფასიანს. ასეთი მარტივი არ იქნება მწეველთა რაოდენობის შემცირება".

ნაციონალური მოძრაობის კიდევ ერთი წევრი ელენე ხოშტარია საზოგადოებრივი თავშეყრის ადგილებში თამბაქოს მოწევაზე რეგულაციების დაწესების წინააღმდეგია და მიიჩნევს, რომ აღნიშნული წესი ბიზნესს დააზიანებს.

პრემიერ-მინისტრმა გიორგი კვირიკაშვილმა, 29 ნოემბრის მთავრობის სხდომაზე განაცხადა, რომ 2017 წლიდან, თამბაქოს ნაწარმზე აქციზის ფასი გაიზრდება და ამას გარდა, იგეგმება საზოგადოებრივი თავშეყრის ადგილებში თამბაქოს მოხმარების კონტროლის გააქტიურებას.