YouTube-ის მოდერატორებმა რუსული ვიდეო წაშალეს, რომელიც ჰომოფობიური "იუმორის" დახმარებით მოქალაქეებს მოუწოდებდა, კონსტიტუციის ცვლილებებთან დაკავშირებულ რეფერენდუმში მონაწილეობა მიეღოთ.

"ვიდეო Youtube-ის პოლიტიკას ეწინააღმდეგება სიძულვილის ენის გამოყენების გამო", — ნათქვამია წარწერაში, რომელიც ვიდეოს ნაცვლად არის ხელმისაწვდომი ბმულზე.

ვიდეოს ავტორი კრემლის მიერ კონტროლირებადი მედია ჯგუფი "პატრიოტია", რომელიც ვლადიმერ პუტინის საქმიან პარტნიორთან, ევგენი პრიგოზინთან არის დაკავშირებული. ერთგვარი "სოციალური რეკლამა" გვაჩვენებს ჰიპოთეტურ რუსეთს, სადაც ამომრჩევლებმა საკონსტიტუციო ცვლილებებს მხარი არ დაუჭირეს. შემოთავაზებულ ცვლილებებში ერთ-ერთი პუნქტი ქორწინებას ჰეტეროსექსუალურ კავშირად განმარტავს. ვიდეოში ორ გეი კაცს თავშესაფრიდან შვილად პატარა ბიჭი აჰყავს, ხოლო თავშესაფრის თანამშრომლები ამ პროცესს შეძრწუნებულები უყურებენ.

ირონიულია, მაგრამ მსახიობი, რომელიც ერთ-ერთ გეი მშობელს თამაშობს, აპირებს, ცვლილებებს მხარი არ დაუჭიროს. მან ჟურნალისტებს უთხრა, რომ გაბრაზებულია კორონავირუსის დროს მთავრობის კონტროლის ზრდის გამო.

ლგბტ აქტივისტები სახელმწიფოს ვიდეოს გამო რეაგირებას სთხოვდნენ და აცხადებდნენ, რომ სხვა შემთხვევაში ვიდეოს ავტორებს უჩივლებდნენ.

რუსეთი 1 ივლისს კენჭს უყრის საკონსტიტუციო ცვლილებებს, რომლებიც, სხვა ასპექტებთან ერთად, პუტინს უფლებას მისცემს, ხელისუფლებაში 2036 წლამდე დარჩეს.

სტატია მოამზადა On.ge-მ აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის დამზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე პასუხისმგებელია On.ge. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.