პრემიერმა გიორგი კვირიკაშვილმა დღეს, 29 ნოემბერს, განაცხადა რომ მთავრობა მოამზადებს რეკლამის შესახებ კანონპროექტს, რომლის მიხედვით ნებისმიერი საქონლის ან მომსახურების ფასის გამოქვეყნება აუცილებელი იქნება ეროვნულ ვალუტაში. პრემიერმა განმარტებისას სამშენებლო კომპანიის მაგალითი მოიყვანა და აღნიშნა, რომ ინიციატივა არ გულისხმობს სხვა ვალუტით ფასის გამოცხადების აკრძალვას:

"სამშენებლო კომპანიამ ბინის ფასი უნდა გამოაცხადოს ლარით და სურვილის შემთხვევაში მიუთითოს ფასი ნებისმიერი სხვა ვალუტით. შედეგად, შემცირდება ჩვენი მოსახლეობის და ჩვენი ქვეყნის ეკონომიკის დამოკიდებულება უცხოურ ვალუტაზე - დოლარზე და სავალუტო ცვლილებები ნაკლებ გავლენას იქონიებს ადამიანების ფინანსურ მდგომარეობაზე და ჩვენს მოქალაქეებს შეეძლებათ, საკუთარი მიმდინარე ხარჯების უფრო ეფექტურად მართვა".

გიორგი კვირიკაშვილმა მთავრობის განახლებული შემადგენლობის სხდომაზე სამომავლო ინიციატივებისა და ეკონომიკის სფეროში დაგეგმილი ცვლილებების შესახებ ისაუბრა.