საქართველოს აეროპორტებში, ასევე, თვითმფრინავში, პირბადის ტარება აუცილებელი იქნება. გარდა ამისა, მგზავრებს მოუწევთ იმ ქვეყნების რეგულაციების დაცვა, სადაც მიემგზავრებიან. ინფორმაციას ამის შესახებ საქართველოს აეროპორტების გაერთიანება ავრცელებს.

უწყებაში ამბობენ, რომ საქართველოს აეროპორტებში პირველი ივლისისთვის მოსამზადებელი სამუშაოები საავიაციო გაიდლაინების მიხედვით მიმდინარეობს და ქვეყანა შიდა და საერთაშორისო ტურიზმის გახსნისთვის ემზადება.

"ვემზადებით პირველი ივლისისთვის. თბილისის საერთაშორისო აეროპორტი რეგულარული საჰაერო მიმოსვლის დასაწყებად პრაქტიკულად მზად არის. მიმდინარეობს ქუთაისის საერთაშორისო აეროპორტისა და საქართველოს აეროპორტების გაერთიანების მართვაში მყოფი შიდა აეროპორტების მომზადება ფრენებისთვის. ყველა აეროპორტში ამჟამად მიმდინარეობს სპეციალური სტიკერებით მონიშვნა, რათა მგზავრებმა შეძლონ დაწესებული მეტრნახევრიანი დისტანციის დაცვა", — ამბობს აეროპორტების გაერთიანების დირექტორი, თამარ არჩუაძე.