გაერთიანებული ოპოზიცია ძალა ერთობაშიას ერთ-ერთი ლიდერი, გიორგი ვაშაძე ამბობს, რომ ნაციონალური მოძრაობის მხარდამჭერები მისი მხარდამჭერებიც არიან, რადგან წარსულში თავადაც სწორედ ამ პარტიაში იყო. ამით ვაშაძე ეხმაურება გავრცელებულ ინფორმაციას, თითქოს გაერთიანებული ოპოზიციის მხრიდან პრემიერად მისი კანდიდატურა უნდა დააყენონ და არა ნაციონალური მოძრაობის. იგი ამ ფაქტს უარყოფს, თუმცა ამბობს იმასაც, რომ ამაზე გუნდმა უნდა იმსჯელოს.

ვაშაძის თქმით, პრემიერად ის კანდიდატი უნდა წარადგინონ, ვისაც ყველაზე დიდი ელექტორალური მხარდაჭერა და ნდობა აქვს.

"ნაციონალური მოძრაობა არის წამყვანი ოპოზიციური ძალა, რომლიდანაც მოვდივარ მეც და როცა გაერთიანებული ოპოზიცია მათთან ერთად გავაკეთე, შემთხვევით კი არ გავაკეთე, ღირებულებითი თანხვედრა მაქვს იმ ხალხთან, ვინც მხარს უჭერს მათ, რას გრძნობენ ის ვიცი, კანზე ვგრძნობ, მიხვდით? რას ფიქრობენ ის ვიცი, იმიტომ რომ შინაარსობლივად იქ ვარ", — ამბობს გიორგი ვაშაძე.

გიორგი ვაშაძემ დღეს, 2 ივნისის ბრიფინგზეც განმარტა, რომ მას პრემიერ-მინისტრის კანდიდატად საკუთარი თავი "ჯერ არ დაუყენებია", არამედ, ეს იყო კონკრეტული პირების მოსაზრებები. მანვე თქვა, რომ ძალა ერთობაშიას, პოლიტიკურ ბლოკს აუცილებლად უნდა ჰყავდეს პრემიერობის კანდიდატიც და აუცილებლად უნდა დაასახელოს გუნდიც.

გიორგი ვაშაძის პრემიერობის კანდიდატად დაყენებაზე გუშინ თაკო ჩარკვიანმა გააჟღერა ინფორმაცია, თუმცა მოგვიანებით, ის ნაციონალური მოძრაობის ლიდერმა, ზაალ უდუმაშვილმა უარყო.

"ერთიანი ნაციონალური მოძრაობის სახელით შემიძლია გითხრათ, რომ პრემიერ- მინისტრობის კანდიდატად გიორგი ვაშაძე არ ყოფილა განხილული არც წარსულში, არც დღევანდელ შეხვედრაზე და არც მომავალში განიხილება", — თქვა უდუმაშვილმა და დაამატა, რომ კონკრეტული გვარები და სახელები შეხვედრაზე არ განხილულა.