ვიცე-პრემიერი, მაია ცქიტიშვილი ოპოზიციის კრიტიკას პასუხობს და ამბობს, რომ მთავრობის ანტიკრიზისული გეგმა საარჩევნო მოსყიდვა არაა. მისი თქმით, ხელისუფლების მიერ შემუშავებული ყველა პაკეტი მიზნობრივია და სექტორის, მოქალაქის საჭიროებაზეა მიმართული.

"ეს არ არის საარჩევნო მოსყიდვა, ეს არის ანტიკრიზისული ღონისძიებები და ჩვენ ძალიან კარგად ვიცით, რომ ჩვენ გვაქვს ძალიან დიდი პასუხისმგებლობა ჩვენი მოქალაქეების წინაშე, ჩვენი ეკონომიკის წინაშე, რასაც არ უნდა ამბობდნენ", — თქვა მაია ცქიტიშვილმა.

დღეს, 28 მაისს პრემიერმა გუნდთან ერთად დეველოპერული სექტორის ანტიკრიზისული გეგმა წარმოადგინა.

ჯამში ბიუჯეტიდან ამ მიმართულებით 434 მილიონი ლარი დაიხარჯება:

  • 70 მილიონი ლარი სახელმწიფოს მიერ საპროცენტო განაკვეთის სუბსიდირება იპოთეკური სესხებზე;
  • 140 მილიონი ლარი სახელმწიფოს გარანტია იპოთეკური სესხების პორტფელზე;
  • 150 მილიონი ლარი სახელმწიფოს მიერ დევნილი ოჯახებისთვის საცხოვრებელი ქონების შესყიდვა;
  • 200 მილიონი ლარი საცხოვრებელი-უძრავი ქონების პროექტების დასრულების გარანტია.