ფინანსთა მინისტრობის კანდიდატმა დიმიტრი ქუმსიშვილმა დღეს, 26 ნოემბერს, პარლამენტში, მთავრობისთვის ნდობის გამოცხადების სხდომაზე განაცხადა, რომ მოსახლეობის ნაწილი ეროვნული ვალუტის გაუფასურებით იმიტომ დაზარალდა, რომ უცხოურ ვალუტაში სესხის აღებისას, განათლების სიმწირის გამო "ტრანზაქციები არ დააჰეჯირეს". მისივე თქმით, თუ სესხების დიდი ნაწილი ლარში გაიცემოდა, მოსახლეობა ნაკლებ თანხას გადაიხდიდა:

"ჩვენს მოსახლეობას ბანკებში უხდება სესხის მომსახურების გადახდა და სწორედაც იმიტომ რომ ჩვენი მოსახლეობის უდიდეს ნაწილს იპოთეკური და სამომხმარებლო სესხები ჰქონდათ უცხოურ ვალუტაში და ფინანსური ცოდნის სიმწირის გამო მათ არ შეეძლოთ რომ დაეჰეჯირებინათ აღნიშნული ტრანზაქციები, შესაბამისად აღნიშნულიდან გამომდინარე ისინი გაცილებით მეტ თანხებს იხდიან, ვიდრე იმ შემთხვევაში, თუ ეს ყველაფერი გაცემული იქნებოდა ლარში".

ქუმსიშვილის თქმით, ეროვნულ ბანკთან ერთად იგეგმება დედოლარიზაციის ახალი პროგრამა, რომელიც მიზნად ისახავს იმას, რომ რაც შეიძლება მეტი დაკრედიტება იყოს ლარით და რაც შეიძლება ნაკლები იყოს სავალუტო კურსი.

ლარის კურსმა ისტორიულ მინიმუმს მიაღწია. ეროვნული ბანკის მიერ გამოქვეყნებული ოფიციალური მონაცემების მიხედვით, 26 ნოემბრის მდგომარეობით, ერთი დოლარის ფასი 2,5026 გახდა, მაშინ როდესაც 25 ნოემბერს მისი ფასი 2,4852 იყო.