29 მაისიდან ყველა სახის მუნიციპალური ტრანსპორტი გაიხსნება, მათ შორის მეტრო. ამის შესახებ განცხადება დღეს პრემიერმინისტრმა გიორგი გახარიამ საკოორდინაციო საბჭოს სხდომაზე გააკეთა.

გახარიას თქმით, აუცილებელი იქნება პირბადის ტარება და ამაზე პასუხისმგებელი იქნებიან მუნიციპალური ტრანსპორტის ხელმძღვანელი ორგანიზაციები ან კერძო ტრანსპორტის მფლობელები.

პრემიერმინისტრმა თქვა, რომ ეს ნაბიჯები გადადგმულია მოქალაქეების სოცუალურ-ეკონომიკური ინტერესების გათვალისწინებით, თუმცა "ყველას უნდა გვახსოვდეს, რომ აუცილებელი პირობა ამ ნაბიჯის შემდგომ, შევინარჩუნოთ ის ტემპი, რომელიც გვაქვს, არის პირბადეების ტარება".

გახარიას თქმით, უფრო დეტალურად გადაწყვეტილების შესახებ ინფორმაციას მთავრობის ადმინისტრაცია გაავრცელებს.

საგანგებო მდგომარეობის დასრულების შემდეგ რიგი შეზღუდვები კვლავ ძალაში დარჩა. დახურულ საჯარო სივრცეში სავალდებულოა პირბადეების ტარება, მათ შორის სავაჭრო ობიექტებში. ასევე, სავალდებულოა სოციალური დისტანციის დაცვაც. ამასთან შეზღუდულია ტაქსებით სამზე მეტი პირის გადაადგილება და მძღოლები ვალდებული არიან პირბადეები ატარონ.