ისრაელის პოლიციის თაღლითობასთან ბრძოლის განყოფილების თანამშრომლებმა, საქართველოს ყოფილი თავდაცვის მინისტრის, დავით კეზერაშვილის მოსყიდვაში ეჭვმიტანილი ყოფილი სამხედრო, ბიზნესმენი გალ ჰირში დაკითხეს. ინფორმაციას ისრაელის მედიაზე დაყრდნობით DF Watch ავრცელებს.

გალ ჰირში

გალ ჰირში

ფოტო: Haaretz

ისრაელის მედიის ცნობით, გალ ჰირში ისრაელის არმიის ბრიგადის გენერალი იყო, სამხედრო კარიერის დასრულების შემდეგ კი კერძო კომპანია Defensive Shield დააარსა, რომლის საქმიანობის სფერო უსაფრთხოების სფეროში კონსალტინგს წარმოადგენდა.

ჰირშსა და თავდაცვის სფეროში მოღვაწე სხვა ოთხი კომპანიის ხელმძღვანელებს სამართალდამცავები სამშაბათს რამდენიმე საათის განმავლობაში კითხავდნენ. ისრაელელ პოლიციელებს ეჭვი აქვთ, რომ მათ მიერ საქართველოსთან გაფორმებული ხელშეკრულებები შეიცავდა ფულის გათეთრების, მოსყიდვის, თაღლითობისა და საგადასახადო სამართალდარღვევის ნიშნებს.

2015 წლის სექტემბერში გალ ჰირში ისრაელის მთავარი პოლიციელის პოსტზე იყო წარდგენილი, თუმცა, Defensive Shield-სა და დავით კეზერაშვილთან დაკავშირებული სკანდალის გამო მისი კანდიდატურა მოიხსნა.

Haaretz-ის ინფორმაციით, ისრაელის პოლიცია ეჭვობს, რომ კომპანია Defensive Shield-ის ხელმძღვანელობამ საქართველოს თავდაცვის იმდროინდელი მინისტრი, დავით კეზერაშვილი მოისყიდა, რათა ათეულობით მილიონობით ამერიკული დოლარის ღირებულების კონტრაქტი მიეღო. ისრაელის პოლიცია ასევე დარწმუნებულია, რომ შუამავალი კეზერაშვილის მეგობარი იყო, რომელიც გალ ჰირშს იცნობდა.

Haaretz წერს, რომ საქართველოს თავდაცვის ყოფილი მინისტრი დავით კეზერაშვილი ამჟამად დიდ ბრიტანეთში ცხოვრობს, საქართველოში კი მის წინააღმდეგ არაერთი სისხლის სამართლის საქმის გამოძიება მიმდინარეობს. თუმცა, დიდმა ბრიტანეთმა იმ მოტივით, რომ მის მიმართ წაყენებული ბრალდებები პოლიტიკურად მოტივირებულია, კეზერაშვილის საქართველოში ექსტრადირებაზე უარი თქვა.

“მისი (კეზერაშვილის) სახელი გამოჩნდა პანამის დოკუმენტებში, რომელიც მცირედით ნათელს ფენს იმ გზას, რომლის საშუალებითაც ის ოლიგარქი გახდა”, - წერს Haaretz.