ევროპული საქართველოს ერთ-ერთი ლიდერი, გიგა ბოკერია მწუხარებას გამოთქვამს, რომ მთავრობამ დამოუკიდებლობის დღესთან დაკავშირებით ეროვნული დროშები ქუჩებში არ გამოფინა.

მისი თქმით, მიუხედავად კორონავურისის გამო შემქნილი სიტუაციისა, გარკვეული ღონისძიებების გამართვა და იმის ხაზგასმა, რომ დამოუკიდებლობის დღე საზეიმოა, შესაძლებელი იყო.

"გილოცავთ კიდევ ერთხელ ამ დიდ დღეს. ძალიან ვწუხვარ, რომ დღესაც ივანიშვილის ხელისუფლებამ საკუთარი დამოკიდებლობა გამოავლინა და ეროვნული დროშებიც კი არ არის გამოფენილი. მე მესმის, რომ არ არის ტიპიური ვითარება, გამოწვევა არის ჯერ კიდევ ამ პანდემიის, მაგრამ რაღაც ღონისძიებების გამართვა და ხაზის გასმა როგორი საზეიმოა ეს დღე შესაძლებელი იყო. ძალიან ვწუხვარ, რომ ასეთი მთავრობა გვყავს, რომ ეროვნული დროშები არ არის ჩვენ ქუჩებში გამოფენილი. ეს მაინც ხო შეიძლებოდა გაკეთებულიყო, რომ ამ დღის მიმართ შენი ხელისუფლების დამოკიდებულება ჩანდეს", — განაცხადა ბოკერია.

დღეს, 26 მაისს საქართველო დამოუკიდებლობის 102-ე წლისთავს აღნიშნავს. კორონავირუსის გამო წელს დამოუკიდებლობის დღესთან დაკავშირებით მასშტაბური ღონისძიებები არ გამართულა. პრემიერმინისტრმა, პრეზიდენტმა და მთავრობის წევრებმა დამოუკიდებლობის დღეს ვაზიანის მე-4 მექანიზებული ბრიგადის ბაზაზე, საქართველოს თავდაცვის ძალებთან ერთად აღნიშნავს.