კოალიცია ევრო-ატლანტიკური საქართველოსთვის განცხადებას ავრცელებს და მოუწოდებს საქართველოს პარლამენტს:

• განსაკუთრებული ყურადღებით მოეკიდოს თავდაცვისა და უშიშროების კომიტეტის ნდობის ჯგუფის დაკომპლექტებას.
• აღადგინოს ნდობის ჯგუფის წევრების კენჭისყრით დანიშვნის წესი და შესაბამისად დააკომპლექტოს ახალი ნდობის ჯგუფი;
• თავდაცვისა და უშიშროების კომიტეტის 2013 წელს არასამთავრობო ორგანიზაციებთან გაფორმებული ურთიერთანამშრომლობის მემორანდუმის საფუძველზე ხელი შეუწყოს სამოქალაქო, დემოკრატიული კონტროლის განხორციელებას უსაფრთხოების სექტორზე და სამოქალაქო საზოგადოებას მიეცეს რეალური საშუალება, რომ ერთის მხრივ მონიტორინგი განახორციელოს მიმდინარე პროცესებზე, მეორეს მხრივ კი თანამონაწილეობით ხელი შეუწყოს უსაფრთხოების სფეროში რეფორმების შემდგომ განხორციელებას.

კოალიცია ევრო-ატლანტიკური საქართველოსთვის წერს, რომ განცხადების ერთ-ერთი განმაპირობებელი ფაქტორი არის მედიაში გავრცელებული ინფორმაცია საქართველოს პარლამენტის დეპუტატის ემზარ კვიციანის ნდობის ჯგუფში სავარაუდო დანიშვნასთან დაკავშირებით.

კოალიცია მიიჩნევს, რომ ნდობის ჯგუფის წარმატებული მუშაობისათვის აუცილებელია მისი დაკომპლექტება მოხდეს შესაბამისი კომპეტენციის, ბიოგრაფიისა და რეპუტაციის დეპუტატებით.

კოალიცია მზადაა აქტიურად ითანამშრომლოს პარლამენტთან საქართველოს ევროატლანტიკური ინტეგრაციისათვის მნიშვნელოვან ყველა საკითხზე.

ამჟამად საქართველოს ახლადარჩეული პარლამენტი თავდაცვის და უშიშროების კომიტეტის ნდობის ჯგუფის ფორმირების საკითხს წყვეტს. ნდობის ჯგუფის უშუალო ფუნქციაა თავდაცვის და სამართალდამცავი ორგანოების საიდუმლო საქმიანობისა და ხარჯების კონტროლი. მას აქვს წვდომა ინფორმაციაზე, რომელიც საქართველოს საერთაშორისო პარტნიორებთან უსაფრთხოების მიმართულებით თანამშრომლობის საკითხებს შეეხება.

კოალიციაში შემავალი არასამთავრობოებია:

1. საერთაშორისო გამჭვირვალობა საქართველო
2. სამოქალაქო განვითარების სააგენტო
3. სამართლიანი არჩევნებისა და დემოკრატიის საერთაშორისო საზოგადოება -
4. ფონდი ღია საზოგადოება საქართველო
5. საქართველოს ატლანტიკური საბჭო
6. საქართველოს ფერმერთა ასოციაცია
7. ინფორმაციის თავისუფლების განვითარების ინსტიტუტი
8. ეკონომიკური პოლიტიკის კვლევის ცენტრი
9. მწვანე ალტერნატივა
10. საქართველოს უსაფრთხოებისა და განვითარების ცენტრი
11. მედიის განვითარების ფონდი
12. საქართველოს გაეროს ასოციაცია
13. საზოგადოება და ბანკები
14. საქართველოს სტრატეგიისა და საერთაშორისო ურთიერთობების კვლევის ფონდი
15. საქართველოს დემოკრატიული ინიციატივა
16. საქართველოს პოლიტიკის ინსტიტუტი
17. სტრატეგიული კვლევების რეგიონული ცენტრი
18. კვლევითი ჟურნალისტიკისა და ადვოკატირების ცენტრი
19. ხმა საქართველოდან
20. ლიბერალური აკადემია თბილისი
21. კავშირი საფარი
22. საქართველოს რეფორმების ასოციაცია
23. მსოფლიო გამოცდილება საქართველოსთვის