პარლამენტის პირველი ვიცე-სპიკერის, გია ვოლსკის განცხადებით, ოპოზიციას საარჩევნო თემები არ აინტერესებს. მისი თქმით, ეუთო/ოდირის შენიშვნებზეა სამსჯელო, ასევე საკონსტიტუციო ცვლილებებია განსახორციელებელი.

"კიდევ გავიმეორებ, ეს თემები არ არის საინტერესო ოპოზიციური კლასტერისთვის, რომელიც ჩამოყალიბდა ნათელაშვილის ეზოში. არ არის სინტერესო, ვინაიდან პერსპექტივა არის ძალიან დაბალი. კიდევ იქნება დასახელებული არაერთი მიზეზი, რომ ეს ცვლილებები არ იქნეს მიღებული და დესტრუქციული რეჟიმი იყოს მთავარი პოლიტიკური მექანიზმი, რომელსაც ისინი გამოიყენებენ", — განაცხადა ვოლსკიმ.

დღეს, 18 მაისს ლეიბორისტული პარტიის ოფისში ოპოზიციური პარტიების შეხვედრა გაიმართა. შეხვედრის დაწყებამდე ოპოზიციური პარტიების წევრები აცხადებდნენ, რომ გიორგი რურუას გათავისუფლებამდე 8 მარტის შეთანხმება შესრულებულად არ ჩაითვლება.