როგორც იცით, პირველი მაისიდან თამბაქოსა და ელექტროსიგარეტის მოწევაზე რეგულაციები მკაცრდება, ეს კი იმას ნიშნავს, რომ უამრავ ადგილას, სადაც აქამდე თავისუფლად ეწეოდით, მოწევას ვეღარ შეძლებთ. თუ ისედაც ფიქრობდით სიგარეტისთვის თავის დანებებაზე, შეიძლება ეს კარგი დრო იყოს.

მოწევას ბევრი დისკომფორტი ახლავს თან: მუდმივად, დღის ყველა მონაკვეთში სიგარეტისა და სანთებელას ქონის აუცილებლობა, ფინანსური ზარალი, რომელიც თუნდაც დღეში ერთ კოლოფს მოაქვს და ის ფაქტი, რომ ბევრ კაფეში ვერ მოწევთ, ხოლო სადაც მოწევთ, იქ სხვებიც ეწევიან და საბოლოოდ კვამლით გაჟღენთილი დაბრუნდებით სახლში. მთავარი კი მაინც ისაა, რომ სიგარეტი ჯანმრთელობას სერიოზულ ზიანს აყენებს, თანაც, არა თეორიულ მომავალში, არამედ ყოველდღიურ რეჟიმში.

მწეველების უმრავლესობა რამდენიმეწლიანი სტაჟის შემდეგ ცხოვრებიდან სიგარეტის ამოღებაზე იწყებს ფიქრს. პირველი ნაბიჯი იმის გაცნობიერებაა, რომ რეალურად საქმე სულაც არ დგას ისე, რომ "როცა მოგინდებათ, დაანებებთ". ერთი კონკრეტული დღის განმავლობაში მოწეული ღერების მცირე რაოდენობა არგუმენტი არაა, რადგან რთული პერიოდი დღეების გასვლის შემდეგ იწყება.

ყველაზე ცუდი სცენარი რომ დავივიწყოთ, რომელიც სიგარეტის კოლოფზე ყველას ამოგვიკითხავს, თამბაქოს ნეგატიურ ზემოქმედებაზე მაინც ვერ დავხუჭავთ თავს.

სიგარეტი ანადგურებს ფილტვების უჯრედებს, შეფერილობას უცვლის კანსა და კბილებს, ართულებს სუნთქვას, სირბილს და ზოგადად, სპორტულ აქტივობას.

თუ ახლა აპირებთ მოწევისთვის თავის დანებებას, შემიძლია გირჩიოთ, როგორ შეიმსუბუქოთ ეს რთული პერიოდი.

სასუსნავები

სიგარეტის ჩანაცვლება სხვადასხვა საკვებით აპრობირებული მეთოდია, თუმცა, შეიძლება მადა ყოველგვარი განზრახვის გარეშეც მოგემატოთ. იმისთვის, რომ საკუთარი თავი აკონტროლოთ, მაგრამ მავნე ჩვევამაც არ გძლიოთ, სცადეთ საღეჭი რეზინის დაღეჭვა, ან უპირატესობა მიანიჭეთ უმარილო სასუსნავს. თავი შეიკავეთ ტკბილეულისგან, მიუხედავად იმისა, რომ შეიძლება სხეულმა სტრესის შესამსუბუქებლად შოკოლადიც მოგთხოვოთ. შეგიძლიათ მიირთვათ პატარა ნაჭრებად დანაწევრებული ხილი ან ბოსტნეული.

ნიკოტინის ტაბლეტები

გარდა ფსიქოლოგიური ფაქტორებისა, არსებობს ნიკოტინის შიმშილიც, რომელიც ყველა მწეველს გამოუცდია. შეგიძლიათ ასეთ დროს მინარევებისგან თავისუფალი ნიკოტინის ტაბლეტი ჩაყლაპოთ. შედეგად, იმ მხუთავი აირის მიღება აღარ მოგიწევთ, რომელიც კვამლთან ერთად ხვდება ორგანიზმში. რა თქმა უნდა, ზომიერება აქაც აუცილებელია. მას შემდეგ, რაც ნიკოტინის შიმშილს დაძლევთ, სხვა ჩვევებსაც გაუმკლავდით: როდის ეწევით ყველაზე მეტს? სამსახურში, როცა ცოტა ხნით ჰაერზე გასასვლელად მიზეზი გჭირდებათ? კაფეში? საკუთარ სახლში? შექმენით ახალი ტრადიციები, შეგიძლიათ გარშემომყოფებს სიგარეტის გარეშეც ეკონტაქტოთ. ჩაანაცვლეთ მოწევა ყავით ან ჩაით.

ინფორმაცია

რა თქმა უნდა, მოწევისთვის თავის დასანებებლად ზუსტი რეცეპტი არ არსებობს. შეიძლება ეს პროცესი ბევრად რთულიც მოგეჩვენოთ, ვიდრე ერთი შეხედვით ჩანდა, მაგრამ მიზანზე კონცენტრირდით. წარმოიდგინეთ საკუთარი თავი ცოტა ხნის მერე: სიგარეტისგან თავისუფალი, ენერგიული და დამოუკიდებელი. ინტერნეტში უამრავი რესურსია, რომელიც ფსიქოლოგიურ მხარდაჭერას აღმოგიჩენთ, შეგიძლიათ გადმოწეროთ აპლიკაციები, რომლებიც დაგითვლიან არმოწეულ ღერებსა და არდახარჯულ ფულს. მართალია, სიგარეტისთვის თავის დანებება რთულია, მაგრამ შეუძლებელი ნამდვილად არაა.

თუ იმაში დარწმუნება გჭირდებათ, რომ მოწევა უამრავ დაავადებას იწვევს, აუცილებლად ნახეთ სხვა შუადღის დღევანდელი გადაცემა.