მოკლული უფლებადამცველი, ვიტალი საფაროვი ჰააგის გამოყენებითი მეცნიერების უნივერსიტეტის ერთ-ერთ კედელზე შვედ აქტივისტთან, გრეტა თუნბერგთან და 2016 წელს მოკლულ ჰონდურასელ უფლებადამცველთან, ბერტა კასერესთან ერთად დახატეს.

უნივერსიტეტის განცხადებით, 8 მეტრის სიგანისა და 15 მეტრის სიმაღლის ნამუშევარი მხატვრების დუეტმა Karski & Beyond შეასრულეს.

ნამუშევარი ადამიანის უფლებათა საყოველთაო დეკლარაციის 70 წლისთავთან დაკავშირებით შეიქმნა და მისი იდეა ორგანიზაცია სამართლიანობა და მშვიდობას ეკუთვნის, თემატიკა და სტუდენტების ჯგუფმა შეარჩია.

"გრეტა თუნბერგი, ბერტა კასერესი და ვიტალი საფაროვი კლიმატისთვის, თავისუფლებისთვის და თანასწორობისთვის არიან თავდადებულნი. ეს არის პატივისცემა სამი ადამიანის მიმართ, რომლებიც აჩვენებენ, რომ ცვლილებების მიღწევა რეალურია", — ნათქვამია უნივერსიტეტის განცხადებაში.

25 წლის უფლებადამცველი ვიტალი საფაროვი 2018 წლის სექტემბერში მოკლეს. არასამთავრობო ორგანიზაციებს თავიდანვე მიაჩნდათ, რომ მის მოკვლას ქსენოფობიური მოტივი ჰქონდა.

საფაროვის მკვლელობისთვის გიორგი სოხაძე და ავთანდილ კანდელაკიშვილი დააკავეს. მათ რასობრივი, რელიგიური, ეროვნული ან ეთნიკური შეუწყნარებლობის გამო განზრახ მკვლელობას ედავებოდნენ. თუმცა მოსამართლემ დადასტურებულად არ მიიჩნია, რომ საფაროვი ეროვნული შეუწყნარებლობის მოტივით მოკლეს.

ბრალდებულებს 15-15 წლით თავისუფლების აღკვეთა მიუსაჯეს.