თბილისის მერის თქმით, ოპოზიცია ცრუობს და ირაკლი ოქრუაშვილის, გიგი უგულავასა და გიორგი რურუას გათავისუფლება 8 მარტის შეთანხმების ნაწილი არ ყოფილა. კახა კალაძე აცხადებს, რომ ამის მანდატი არავის ექნებოდა, გარდა პრეზიდენტისა:

"ოპოზიცია ცრუობს, როცა ამბობს, რომ შეთანხმების ნაწილი იყო იმ კრიმინალების გამოშვება, რომელთაც გარკვეული დანაშაულები აქვთ ჩადენილი. ეს სიმართლეს არ შეესაბამება, იმიტომ, რომ ვერც მთავრობას, ვერც პარლამენტს ვერანაირი ბერკეტი ვერ ექნება იმისა, რომ კონკრეტიული ადამიანები გაათავისუფლოს ციხიდან. ერთადერთი ადამიანი, ვისაც აქვს ამის შესაძლებლობა და მანდატი, არის პრეზიდენტი".

ამასთან, კალაძის თქმით, 8 მარტის შეთანხმებაში არაფერი იყო ნათქვამი პატიმრების პრეზიდენტის მიერ შეწყალებაზე.

"არ ვიცი [პრეზიდენტი] რას გადაწყვეტს, თუმცა, ცხადია, არავის უნდა მიეცეს შესაძლებლობა, სიტუაცია დაძაბონ, არეულობა შემოიტანონ", — ამბობს კალაძე.