თბილისის მერმა კახა კალაძემ სამოქალაქო მოძრაობა #სირცხვილიას უპასუხა პარლამენტის ტერიტორიის რეაბილიტაციაში დახმარებაზე და იქ აქციის გამართვაზე. ჟურნალისტებთან საუბარში კალაძემ თქვა, რომ სამუშაოებს დაასრულებს ის, ვინც იცის თავის საქმე:

"[ისინი] ღირსეულად ართმევენ თავს [სამუშაოს]. აქციების და შეკრების შეზღუდვა არასდროს არ ყოფილა. ჩვენი მიდგომები და დამოკიდებულებაა, რომ ყველამ გამოხატოს აზრი".

კალაძის თქმით, პარლამენტის წინ რეაბილიტაცია გრძელდება, თუმცა არ იცის, როდის დასრულდება. მისივე განმარტებით, კორონავირუსის პანდემიის დროს იყო სამუშაოების გარკვეული შეფერხება.

სამოქალაქო მოძრაობა #სირცხვილია 20 ივნისს პარლამენტთან აქციას გეგმავს და მანამდე, თბილისის მერს, კახა კალაძეს რეაბილიტაციის დასრულებაში დახმარებას სთავაზობს. შესაბამისი ქართულ-იტალიური განცხადება მოძრაობის ფეისბუქგვერდზე გამოქვეყნდა.